Májilistegi «Amanat» partııasy fraksııasynyń depýtattary Memleket basshysynyń Úkimettiń keńeıtilgen otyrysynda bergen tapsyrmalaryna jan-jaqty zańnamalyq qoldaý kórsetip keledi. Fraksııa jınalysynda parlamentshiler aldynda turǵan jańa mindetterdi talqyǵa saldy.
Is-sharany ashqan Májilis spıkeri, «Amanat» partııasynyń tóraǵasy Erlan Qoshanov Prezıdentimizdiń jedel sheshýdi qajet etetin eń mańyzdy máselelerdi aıqyndap bergenin atap ótti. «Memleket basshysy Qasym-Jomart Toqaev tapsyrmalardy oryndaýǵa tıimsiz bıýrokratııalyq tásilder kedergi keltirip otyrǵanyn atap ótti. Búginde naqty nátıjege baǵyttalǵan kásibı tásil qajet. Bul qaǵıdany biz zań shyǵarý barysynda da ustanýymyz kerek. Májiliste ázirlengen árbir zań Prezıdenttiń memleketti damytý men halyqtyń ál-aýqatyn arttyrýdy kózdeıtin mindetterin júzege asyrý úshin jumys isteýi tıis», dedi ol.
Májilis spıkeri Memleket basshysy «Amanat» usynǵan úmitkerdi Premer-mınıstr laýazymyna taǵaıyndaǵanyn jáne bul sheshim Prezıdenttiń partııaǵa degen zor senimin kórsetkenin atap ótti. «Memleket basshysy ekonomıka ósimin jyl saıyn keminde 6 paıyz deńgeıinde ustap otyrý jáne 2029 jylǵa qaraı IJО́ kólemin 450 mlrd dollarǵa jetkizý jóninde aldymyzǵa naqty mindet qoıdy. Osyǵan baılanysty, Parlament depýtattary men Úkimet músheleri birlesip, tyǵyz jumys isteýi kerek. Alda turǵan barlyq tapsyrmany tek bir judyryq bolyp jumylsaq qana tıimdi júzege asyra alamyz», dedi Erlan Qoshanov.
Prezıdent tapsyrmalaryn oryndaýǵa arnalǵan jıyn barysynda partııa fraksııasynyń músheleri de sóz aldy. Ashat Aımaǵambetov halyqty memlekettik áleýmettik qoldaý tetikterin qaıta qaraý, Nurtaı Sabılıanov Qurylys kodeksine jáne memlekettik satyp alý jónindegi jańa zań jobasyna túzetý engizýde depýtattar tarapynan atqaryp jatqan jumystardy, Sergeı Ponomarev sý resýrstaryn tıimdi paıdalaný jáne Sý kodeksin ázirleý, Bolatbek Najmetdınuly kólik-logıstıkalyq áleýetti damytý, Berik Beısenǵalıev bıýdjet jáne salyq saıasatynyń tıimdiligin arttyrýǵa qatysty óz usynysyn aıtty. Al Nurjan Áshimbetov Prezıdenttiń aýyl sharýashylyǵy baǵytyna qatysty tapsyrmalaryn júzege asyrý josparlary týraly málimet berdi. Jıyndy qorytyndylaı kele, Májilis spıkeri Erlan Qoshanov «Amanat» fraksııasy Prezıdent tapsyrmalaryn júzege asyrý jumysyn kúsheıtýge tıis ekenin atap ótti.