Májiliste ótken orman órtteriniń aldyn alý jáne olarmen kúres taqyrybyna arnalǵan Úkimet saǵatynda depýtat Ermurat Bapı Ekologııa jáne tabıǵı resýrstar mınıstri Erjan Nysanbaevqa saýal joldap, órt zardabyn joıýdyń jaıyn surady, dep jazady Egemen.kz tómengi Palatanyń baspasóz qyzmetine silteme jasap.
«Biz orman-toǵaıy tym mardymsyz elderdiń qataryndamyz. Eldegi orman qoryn aıalap, saqtap molaıtýymyz kerek. Al bizde kerisinshe. Byltyr Qostanaı men Abaı oblysynda alapat órt boldy. Prezıdent Úkimetke naqty tapsyrmalar bergen edi. Búgingi kúni orman qoryn qalpyna keltirý máselesinde Abaı, Qostanaı oblystarynda qandaı naqty jumystar júrgizilip jatyr? Orman qoryn tolyq qalpyna keltirýdiń bolashaqtaǵy múmkindigi qandaı? Semeı ormanynda bolǵan alapat órttiń tolyq shyǵyny anyqtaldy ma?», dep surady depýtat.
E.Bapıdyń saýalyna qatysty jaýap bergen mınıstr E.Nysanbaev Semeı ormany boıynsha byltyr qazan aıynda shtab qurylǵanyn, jol kartasy jasalǵanyn aıtty. 63,5 myń gektar jerdegi 6 mıllıon tekshemetr órt shalǵan aǵashty tamyrymen qazyp alyp, ornyna jańa kóshet egý máselesi talqylanyp jatqanyn jetkizdi.
«Eń aldymen biz ózegin órt shalyp qýraǵan aǵashtardy kesip áketip, alqapty tazartýǵa kúsh salamyz. Bul sharýaǵa orman alqaby sırek ońtústik, batys oblystarynyń orman sharýashylyq mamandaryn shaqyryp, tómen baǵada usynsaq deımiz, ózderi kelip qazyp alady. Tazarǵan alqapqa aǵash kóshetterin egemiz», dedi mınıstr. Biraq órtengen orman aǵashynyń 20-25 paıyzy ǵana kádege jaraıtynyn, qalǵany tek otyn ekenin aıtty.