Ál-Farabı atyndaǵy Qazaq ulttyq ýnıversıtetinde kórnekti ǵalym, túrki álemine ortaq tulǵa, majarstandyq túrkitanýshy, qaıratker Ishtýan Qońyr Mandokıdiń týǵanyna 80 jyl tolýyna oraı halyqaralyq ǵylymı konferensııa ótti, dep jazady Egemen.kz.
Ishtýan Qońyr Mandokıdiń ómir joly men rýhanı murasyn zertteý, ǵylymı eńbekterin nasıhattaý, shyǵarmalaryn jańa sıpatta qarastyryp, ǵylymı jumys júrgizý, sondaı-aq túrkologııadaǵy túıtkildi máselelerdi talqylaýdy maqsat etken «Túrkitanýdaǵy Shyǵys pen Batystyń altyn kópiri – Qońyr Mandokı» taqyrybyndaǵy konferensııany ulttyq ýnıversıtet IýNESKO aıasynda Halyqaralyq mádenıetterdi jaqyndastyrý ortalyǵymen birlesip uıymdastyrdy.
Halyqaralyq jıyndy ál-Farabı atyndaǵy QazUÝ rektory Janseıit Túımebaev ashyp, Qońyr Mandokı túrki áleminde erekshe oryn alatynyn atap ótti. О́z sózinde rektor áıgili ǵalymnyń shyǵarmashylyq eńbekteri men ǵylymdaǵy baı murasy tereń zertteýdi qajet etetindigine toqtaldy.
«Qońyr Mandokı – túrki halyqtarynyń 15 tilin erkin meńgergen polıglot, daryndy ǵalym, kórnekti túrkolog-zertteýshi. Turan halyqtarynyń folklorlyq-dúnıetanymdyq fılosofııasyn nasıhattady. Eýropalyq qypshaqtanýdyń negizin qalap, osy salada kóshbasshy ǵalym atandy. Ǵylymı jetistikterimen qatar, qaıratker tulǵa túrki áleminiń rýhanı yntymaqtastyǵyna eleýli eńbek sińirdi. Túrki halyqtarynyń salt-dástúrin, mádenıetin, ulttyq dilin zerttep, tyń jańalyqtar ashty. Qońyr Mandokıdiń ómiri – jas urpaqqa ónege, eńbekteri – jas zertteýshiler úshin úlken qazyna. Adamzat órkenıetindegi túrkiler fenomenin álemge pash etken ǵalymnyń ǵylymı mektebin jalǵastyrý – túrkitanýshy ǵalymdardyń aldyndaǵy paryz ben mindet», dedi rektor óz sózinde.
Jıyn barysynda IýNESKO aıasynda Halyqaralyq mádenıetterdi jaqyndastyrý ortalyǵynyń dırektory Oljas Súleımenov is-sharanyń mańyzdylyǵyn atap ótti.
О́z kezeginde Parlament Senatynyń depýtaty Darhan Qydyráli «Qońyr Mandokıdiń 70 jyldyǵyna oraı 2014 jyly Astana qalasynda halyqaralyq shara ótkenin edi. Sol kezde ǵalymnyń jubaıy Ońaısha Mandokıdiń ruqsatymen 16 myń kitaptan turatyn kitaphanasyn alyp kelip, «Mandokı Túrkologııa» kitaphanasy jasaqtaldy. Bul jumystar áli de jalǵasyn taba beredi. Qońyr Ishtýan bastaǵan rýhanı kerýen eki eldiń dostyǵy men baýyrlastyǵyna tyń serpin bergenine kýá bolyp otyrmyz», dedi.
Taǵylymdy is-sharaǵa TÚRKSOI Jazýshylar odaǵynyń tóraǵasy Ulyqbek Esdáýlet, Halyqaralyq túrki akademııasynyń vıse-prezıdenti Ashat Kesikbaev, Qazaqstannyń Majarstandaǵy elshisi Jánibek Ábdrashov, IýNESKO aıasynda Halyqaralyq mádenıetterdi jaqyndastyrý ortalyǵy dırektorynyń orynbasary Saltanat Áshimova, Majarstannyń Qazaqstandaǵy bas konsýly mindetin atqarýshy Imre Pıter, QR eńbek sińirgen qaıratkeri, tarıhshy Marat Sembi, Móvsúmli Djavıd, Ásel Lahaeva, Devıd Somfaı jáne basqa da ǵalymdar qatysyp, Mandokı murasynyń mańyzyn talqylady.
Jıyn barysynda zertteýshi ǵalymnyń eńbekterine arnalǵan kitap kórmesi ótti.