Aqtóbelik muǵalim Jasulan Qaıdasov oqýshylarǵa arnap ázirlegen elektrondy qosymshasy Almatyda ótken pedagogıkalyq ıdeıalar festıvalinde jeńip, mamandar tarapynan joǵary baǵalandy. О́ziniń vırtýaldy kómekshisin matematıka páni muǵalimi nebári bir aıdyń ishinde jasap shyǵarǵan, dep habarlaıdy Egemen.kz.
Aqtóbe oblysy bilim basqarmasynyń málimetinshe Telegram arnasyndaǵy chat-bot tapsyrmalardy oqýshylardyń esine salyp, ony túsindiredi jáne keri baılanysty qoldaıdy. Pedagogtiń aıtýynsha bulaı sóılesý oqýshylarǵa unaǵan. Muǵalimder men ata-analar da mundaı jańashyldyq balalardyń pán boıynsha biliktiligin arttyrýǵa kómekteskenin moıyndap otyr. «Bul qosymsha – men úshin de, balalar úshin de mańyzdy kómekshi. Baıqaımyn, balalardyń matematıka sııaqty qyzyqsyz ári kúrdeli bolyp kórinetin pánge degen qyzyǵýshylyǵy artyp, neǵurlym uıymshyl bolǵan. Qosymsha oqý úrdisiniń menedjmentin uıymdastyrýǵa kómektesedi. Oqýshy ony táýlik boıy qoldana alady. Bot olarǵa avtomatty túrde jaýap beredi. Qajet bolsa menimen baılanys ornatady», deıdi muǵalim. Jańashyl muǵalim dáris beretin eki klasta elektrondy qosymsha testileýden ótkizilip jatyr. Tájirıbe tıimdi bolyp shyqsa, atalǵan jańalyq barlyq jerde engiziletin bolady.