Nargızanyń altyny

Elge oljaly oralǵan sportshy men onyń jattyqtyrýshysy Elena Kotovany oblys ákiminiń orynbasary Erlan Qusaıyn qarsy alyp, sátti óner kórse­týi­men quttyqtady.

– Bul – táýelsiz Qazaq­stan­nyń sý sportynan álem chem­pıo­natyndaǵy alǵashqy altyny. Jaqynda Nargızanyń Qy­taıdaǵy Azııa oıyndarynyń qola júldegeri bolǵany da erekshe qýantady. Qol jetkizgen jetis­tik­termen jáne jańa jeńis­terińiz jalǵasa berýin tileımin, – dedi Erlan Beı­sembaıuly.

Nargıza Bolatova 6 jasynan bastap sınhrondy júzýmen aınalysady. Ol – halyqaralyq dárejedegi sport sheberi, sý spor­ty túrleri boıynsha el qu­ra­masynyń kapıtany, respýb­lıkalyq jáne álemdik chempıo­nattardyń birneshe dúrkin júl­degeri.

– Jeńimpaz ataný úshin uzaq jáne aýyr jattyǵý qajet. Qar­sylastarym myqty boldy. Men emosııalardy, sýdaǵy teatrdy kórsetýge tyrystym. Biraq sonymen birge baǵdarlamanyń kúr­de­liligin kórsetý qajet edi. Edýardpen jumys isteý ońaı boldy. Ol talantty sportshy, biz bir-bi­rimizge kómektestik. Endi álem kýboginiń kelesi ke­zeń­derine daıyndalamyn. 2028 jyly Olımpııa oıyndarynyń baǵdarlamasyna aralas dýetter engiziledi dep úmittenemin, – deı­di jeńimpaz Nargıza.

Búginde ártistik júzý­den ult­­­tyq quramaǵa Qara­ǵan­dy ob­ly­­synyń jeti ókili kiredi. Olar­dyń barlyǵy – Qazaq­stan­nyń eńbek sińirgen jattyq­ty­­rý­shysy Elena Kotovanyń tár­bıelenýshileri.

– Nargızanyń alǵan altyny eńbegine laıyq. Ol óte ta­bandy jáne eńbekqor. Onyń maq­saty aıqyn jáne oǵan jetýde tabandylyqpen qadam basyp keledi. Ulttyq quramada bar­lyǵy Nargıza sııaqty bolǵanyn qalaımyn. Temirtaýda sınhron­dy júzý sport túri tanymal. Kóp qyzdar keledi, biz bárin qabyl­daımyz. Eń bastysy, balanyń ózi bir nársege qol jetkizgisi kelýi kerek, al biz ony qoldaımyz jáne baǵyttaımyz, – deıdi Qaraǵandy ob­lysynyń kórkemdik júzýden aǵa jattyqtyrýshysy Elena Ko­tova.

Oblys ákiminiń orynbasa­ry sportshy men onyń jattyqtyrý­shysyna yqylas gúli men 1,5 mln teńgelik sertıfıkat tabys etti.

Qaraǵandy oblysy