Tatarstan astanasyna barǵan Memleket basshysy Qasym-Jomart Toqaev pen basqa elderdiń prezıdentteri «Bolashaqtyń oıyndary» halyqaralyq mýltısport týrnıriniń negizgi sharalary ótetin «Qazan Ekspo» keshenin aralap kórdi, dep habarlaıdy Egemen.kz Aqordaǵa silteme jasap.
Ekskýrsııa barysynda qonaqtarǵa Dota 2 kongress-zaly, art-nysandar, «fıdjıtal-zerthana» kórsetildi, sondaı-aq dene shynyqtyrý men kıbersportty (physical+digital) biriktiretin ınnovasııalyq «fıdjıtal-qozǵalystyń» erekshelikteri tanystyryldy.
Alańdardyń birinde Qazaqstan Prezıdenti «Fýtbol dostyqqa jol ashady» baǵdarlamasyna qatysatyn jas sportshylarmen áńgimelesti. Halyqaralyq komandanyń quramynda «Astana» fýtbol klýbynda jattyǵatyn 10 jastaǵy Jan Álı Ermaǵambetov te bar.
Qasym-Jomart Toqaev Qazaqstanda balalar sportyna memleket tarapynan turaqty qoldaý kórsetiletinin atap ótti.