26 aqpan men 3 naýryz aralyǵynda Taıpeıde mánerlep syrǵanaýdan jastar arasyndaǵy álem birinshiliginiń jalaýy jelbireıdi. Bul jarystyń jekelegen saıysynda Qazaqstannyń eki óreni óner kórsetedi. Olar – Oleg Melnıkov pen Ekaterına Balıýba.
1976 jyldan beri úzdiksiz uıymdastyrylyp kele jatqan jarysta Qazaqstan quramasy komandasynyń músheleri tek bir ret jeńis tuǵyryna kóterildi. Ondaı baq Mıhaıl Shadorovqa buıyrdy. Almatynyń týmasy 2022 jyly Estonııanyń astanasy Tallınde ótken baıraqty básekede kúmis medaldy oljalady.
О́zgelerdi aıtpaǵanda, Denıs Ten men Elızabet Tursynbaevaǵa da jastardyń álem birinshiliginde júlde alý baqyty buıyrǵan joq. Máselen, Ten jasóspirimder men jastar býyny arasyndaǵy básekelerge bes márte qatysty. Eń úzdik kórsetkishi – 4-oryn. 2015 jyly Elızabet Tursynbaeva 4-orynnan asa almady.
Esesine eresekter dýyna erkin qosylǵan qos jerlesimiz ózderiniń asqan sheberligimen jahan jankúıerlerin tánti etti. Denıs Ten 2014 jyly Sochı Olımpıadasynda kúmis alsa, 2013 jyly London jáne 2015 jyly Shanhaıdaǵy álem chempıonattarynda ekinshi jáne úshinshi oryndardy ıelendi. Dúnıejúzilik Ýnıversıada, Azııa oıyndary jáne Tórt qurlyq birinshilikterin utty. Kim bilsin, eger 2018 jyldyń shilińgir shildesinde jol toryǵan jaýyzdar Denısti óltirip ketpegende, ataǵy alysqa jaıylǵan sportshynyń tuǵyry búgingiden de bıik bolar ma edi?!
Elızabet 2019 jyly Saıtamadaǵy álem chempıonatynda, Krasnoıarskidegi Dúnıejúzilik Ýnıversıadada jáne Anahaımdaǵy Tórt qurlyq birinshiliginde kúmis medaldy moınynda jarqyratty. Joǵaryda atalǵan jarystarda Elızabettiń muz aıdyndaǵy myń buralǵan bıi men óreli ónerine súısingen tórtkúl dúnıe jankúıerleri qulshyna qol soqty. Eń ókinishtisi, eski jaraqaty jıi-jıi mazalaǵannan soń, 2021 jyly naǵyz kemeldengen 21 jasynda sulý da symbatty qyz úlken sportpen túbegeıli qosh aıtysty.
Jastar arasyndaǵy sońǵy álem birinshiligi 2023 jyly Kanadanyń Kalgarı qalasynda ótti. Uldardyń básekesinde Japonııanyń jas juldyzdary Kao Mıýra altyn alsa, Nadzomý Esıoka qolaǵa qol sozdy. Shveısarııanyń týy astynda óner kórsetetin taǵy bir japon jigiti Naokı Rossı kúmispen kúpteldi. Qyzdardyń saıysynda Kúnshyǵys elinen kelgen Mao Sımada bas júldeni oljalasa, Amı Nakaı úzdik úshtikti túıindedi. Ońtústik Koreıanyń ókili Sın Djıa kúmis medaldy moınyna ildi. Juptyq jarysta amerıkalyq Sofııa Baram men Denıel Tıýmensev top jarsa, sporttyq bıde chehııalyq Katerjına Mrazkova men Danıel Mrazektiń mereıi ústem boldy.
Úıeńki japyraqtar elinde Qazaqstannyń mánerlep syrǵanaýshylary arasynan Dıas Jırenbaev pen Rahat Bralın qysqa baǵdarlamada táýir syrǵanap, fınaldyq kezeńge ótti. Biraq sheshýshi tusta olar keńinen kósile almaı, qalyń toptyń arasynda qalyp qoıdy. Qos jattyǵýdyń qorytyndysy boıynsha Dıas 16-orynǵa turaqtasa, Rahat 20-satyǵa jaıǵasty. Al Oleg Melnıkov pen Anna Levkoves 35-oryndy qanaǵat tutty.
Taıpeıdegi birinshilikte eki otandasymyzdyń baq synaıtynyn joǵaryda aıttyq. 18 jastaǵy Oleg Melnıkov 2022 jyly Túrkııada ótken Bosfor kýboginde úshinshi oryndy ıelendi. Bul – onyń halyqaralyq jarystardaǵy onyń eń úzdik nátıjesi. Sonymen qatar Melnıkov byltyr Kalagarıdegi básekede baq synap, sol sapardan biraz tájirıbe jınap qaıtqan. 14 jastaǵy Ekaterına Balıýba úshin bul – alǵashqy dúbirli doda. Ol elishilik jarystarda júlde alyp, Majarstandaǵy «Jegvirag Cup» týrnırinde úzdik úshtiktiń qatarynan kórindi.