Qazaqstan musylmandary dinı basqarmasynyń tóraǵasy, bas múftı Naýryzbaı qajy Taǵanuly Atyraýda ótken ǵylymı konferensııada ekstremızmmen kúrestiń tóte joly retinde salt-dástúr men durys sharıǵatty dáripteý ekenin aıtty, dep habarlaıdy Egemen.kz.
Onyń paıymynsha, qazaq dástúriniń ózi dinmen sabaqtasyp jatyr. Ekstremızmniń aldyn alý úshin ulttyq salt-dástúrdi, durys sharıǵatty dáripteý qajet.
- Dástúr degenimiz – elimizde qalyptasqan dinı tájirıbeler tizbegi jáne bizdiń ómir súrý saltymyz. Búginde qazaqtyń dástúrin joqqa shyǵaryp, el ishine ylań salyp júrgender joq emes. "Qazaq dinsiz bolǵan" degen syndy shala túsiniktegiler elimizdi ıslam dinine endi táı-táı basqan baladaı kórsetkisi keldi, – dedi bas múftı.
Onyń aıtýynsha, alaıda jat aǵymnyń jeteginde ketkender din men dástúrdi bir-birine qarsy qoıý arqyly el ishin araz etip otyr.
- Olar bul álemdi óz qalaýyna qaraı ózgertýge tyrysady, dástúrli qundylyqtardy tolyǵymen joıyp jibergisi keledi. Radıkalızm men ekstremızmge jeteleıdi. Osy rette aıta ketý kerek, destrýktıvti aǵymdar tek ıslam dinin jamylyp, óz nıetterin júzege asyrmaıdy, jat aǵymnyń protestanttyq jáne shyǵystyq túrleri de bar. Eń qyzyǵy jat aǵymdardyń qarajat tabý, bılikke barý, óz ıdeologııasyn taratý syndy kózdegen maqsaty bolady, – dedi Naýryzbaı qajy Taǵanuly.