Quramynda psıhotroptyq zat bar veıpterdi el aýmaǵyna jetkizý arnasy áshkere boldy. Atalǵan faktini QMA Almaty qalasy boıynsha departamenti tergep jatyr, dep habarlaıdy Egemen.kz.
− «Jetisý» keden beketiniń aımaǵynda psıhotroptyq zat – tetragıdrokannabınol (TGK) bar 84 dana elektrondy temeki salynǵan poshta jóneltilimderi anyqtaldy. Jedel-izdestirý sharalarynyń nátıjesinde taǵy 103 dana elektrondy temeki jáne ıisi bar qońyr tústi suıyqtyq quıylǵan 42 klıromaızer tabylyp, tárkilendi, − delingen habarlamada.
Bul sálemdemeler Qazaqstanǵa AQSh-tan halyqaralyq poshta arqyly kelgen eken. Sot qaýlysymen osy qylmysty jasady degen kúdikti 2 aı merzimge qamaldy.
Sotqa deıingi tergeý jalǵasady. Tergeý múddesine saı ózge málimetter jarııalanbaıdy.