Búginde jastardyń mádenı-rýhanı kemeldenýine baǵyttalǵan orta kóp. Sonyń biri – «Jastar Talks» jobasy. Astana qalasy ákimdiginiń «Astana jastary» Jastar resýrstyq ortalyǵy uıymdastyratyn alań jasóspirimder men jastardyń jeke jáne áleýmettik damýyna járdemdesedi.
«Jastar Talks» – 2020 jyly iske qosylǵan joba. Alǵash qala ákimimen kezdesýden bastalǵan alań búginde elordadaǵy jastar mádenıeti men ómirin jaqsartýǵa qatysty saýaldardy talqylaıtyn, ıdeıa usynatyn ortaǵa aınalǵan.
– Bizdiń kózdegen maqsatymyz – jastardyń jeke jáne áleýmettik damýyna yqpal etý, olardyń bos ýaqytyn uıymdastyrý, shyǵarmashylyq túrde ózin damytýy úshin jaǵdaı jasaý. Kezdesýge jastardy yntalandyratyndaı, óz salalarynda belgili bir tájirıbesi bar sportshylar, blogerler, medıa tulǵalar jáne taǵy basqalardy tartamyz. Biri ózine degen senimsizdikti qalaı jeńgenin aıtsa, endi biri mamandyq tańdaý syndy ózge de túıtkildi máselelerge toqtalady, – dedi «Astana jastary» Jastar resýrstyq ortalyǵy Jastar bastamalaryn qoldaý bóliminiń mamany Aısulý Qaıyr.
Jyl basynan beri jastarǵa arnalǵan platformada alty kezdesý ótken. Spıker retinde MMA boıynsha álem chempıony Amanjol О́teýov pen MMA boıynsha Qazaqstan chempıony Rýslan Shanosov, short-trekten halyqaralyq dárejedegi sport sheberi Abzal Ájǵalıev, 24KZ arnasynyń júrgizýshisi, «President» arnaıy jobasynyń avtory jáne júrgizýshisi Ádil Baltabaev pen Habar telearnasynyń jýrnalısi, bloger Móldir Dospaeva arnaıy shaqyrylypty. Taıaýda ǵana bokstan jastar halyqaralyq dárejedegi sport sheberi jáne jattyqtyrýshy Muhıt Amantaevpen júzdesken. Sportshy óz tájirıbesimen bólisip, jas býyn aldynda mamandyq tańdaýdyń mańyzyna toqtaldy.
– Ár mamandyqtyń óz ereksheligi bolady. Keı jasóspirimder otbasyndaǵy ata-analaryna, aǵa-ápkelerine qyzyǵyp, dáriger, quqyq qorǵaý organdarynyń qyzmetkeri, sport sheberi bolyp jatady. Desek te, eń aldymen, belgili bir kásipti meńgerer aldynda «Bul meniń qolymnan kele me?» degen saýal qoıyńyz. Salalardyń qaısysy janǵa jaqyn, al qaısy salada jumys istegińiz kelmeıdi, osyny anyqtap alý kerek. Tipti sheshim qabyldaý qıyn bolsa, qazir ınternette kásibı qabiletińizdi anyqtap beretin neshe túrli test bar, osy test kómegimen qandaı qabiletińizdiń jetik ekenin anyqtaý qıyn emes, – dedi Muhıt Amantaev.
Uıymdastyrýshylardyń sózinshe, búginde mundaı alańdardy izdeıtin jastardyń qatary kóp. Bir kezdesýdiń ózinde ortasha eseppen 50-den asa azamat qatysady eken.