Memleket basshysy Senat tóraǵasy Máýlen Áshimbaevty qabyldady. Prezıdentke Parlament Senatynyń reformalardy zańnamalyq turǵydan qamtamasyz etý jumystarynyń ótken aılardaǵy qorytyndysy jáne aldaǵy kezeńge arnalǵan jospary jóninde málimet berildi, dep habarlaıdy Egemen.kz Aqordanyń baspasóz qyzmetine silteme jasap.
Máýlen Áshimbaevtyń aıtýynsha, Memleket basshysynyń elimizdi jáne óńirlerdi damytýǵa baǵyttalǵan tapsyrmalarynyń júzege asyrylýy Senat úshin negizgi basymdyq sanalady.
Qazirgi ýaqytta áıelderdiń quqyǵy men balalardyń qaýipsizdigin qamtamasyz etý, densaýlyq saqtaý, transferttik baǵa belgileý, halyqtyń kóshi-qony, baılanys jáne sıfrlandyrý, ǵylym jáne bilim máselelerine qatysty zańdar senatorlardyń qaraýynda jatyr. Al senatorlar ǵylym, sot júıesin reformalaý, organıkalyq ónimderdiń aınalymy, qaýipsiz eńbek jaǵdaıyn jetildirý jáne jumysshylardyń eńbek quqyqtaryn qorǵaý jónindegi 10 zań jobasyn Májilistiń qaraýyna usyndy.
Bıyl Bıýdjet, Qurylys, Sý, Salyq jáne Sıfrlyq kodeksterin, sondaı-aq «Memlekettik satyp alý týraly», «Mass-medıa týraly» jáne «Jylý energetıkasy» týraly zań jobalaryn qaraý josparlanyp otyr.
Senat Tóraǵasy Memleket basshysynyń tapsyrmasymen qurylǵan Qazaqstannyń Ornyqty damý salasyndaǵy ulttyq maqsattary men mindetteriniń iske asyrylýyna monıtorıng júrgizý jónindegi parlamenttik komıssııanyń jumysy týraly baıandady.
Buǵan qosa, Prezıdentke Álemdik jáne dástúrli dinder kóshbasshylary sezi hatshylyǵynyń qyzmeti tanystyryldy. Qazirgi kezde Sezdi damytýdyń 2023-2033 jyldarǵa arnalǵan tujyrymdamasy júzege asyrylyp jatyr.
Spıker Máýlen Áshimbaev Qasym-Jomart Toqaevqa Senattyń máslıhat depýtattarymen aradaǵy jumysy jandana túskenin aıtty. Bul iske «О́ńir» depýtattyq toby men Senat janyndaǵy jergilikti ókildi organdarmen ózara is-qımyl jasaý jónindegi keńes belsendi atsalysýda.
Bıyl elimizdegi máslıhat ınstıtýtynyń qurylǵanyna 30 jyl tolady. Osyǵan oraı sáýir aıynda halyqaralyq konferensııa ótkizý josparlanyp otyr.
Kezdesý sońynda Prezıdent elimizde júrgizilip jatqan reformalardy zańnamalyq turǵydan qoldaýdyń róli zor ekenin atap ótti. Qasym-Jomart Toqaev aımaqtardyń damýyna barynsha kómek kórsetý memlekettik saıasattyń mańyzdy baǵyty dep sanaıdy. Onyń pikirinshe, bul iske jergilikti ókildi organdardyń depýtattaryn keńinen tartý qajet.