Túrkistanda 13 jastaǵy oqýshy 1,5 jylda 767 kitapty oqyp bitirgen, dep habarlaıdy Egemen.kz.
Otyrar.kz saıtynyń jazýynsha, Fatıma Álisherqyzy bir kitapty 3-4 saǵatta oqıdy. Ol klassıka jáne fentezı janryndaǵy kitaptardy oqyǵandy jaqsy kóredi.
«Eń unatyp oqıtynym - Hárrı Potter kitaby. Stepp&world baspasy jeti tomnyń barlyǵyn qazaq tiline aýdaryp shyqty. Bizdiń mektepke de bul kitap keldi. Men osy kitaptyń bárin satyp alyp oqyǵanmyn. Bul kitapqa arnaıy zertteýler jasalǵan eken, ıaǵnı bul kitapty oqyǵan oqýshylar zorlyq-zombylyqtyń kez kelgen túrine shydaı almaıdy», deıdi ol.
5 jylda 5000 kitap oqýdy maqsat etken oqýshy qyz shet tilderdi de úırenýge áýes. Ol qazir aǵylshyn tilin úırenip júr. Ol endi Hárrı Potterdiń túpnusqasyn oqyǵysy keledi.
Fatıma Álisherqyzy oqýda da ozat, mekteptegi is-sharalarǵa da belsene qatysady.