Naýryz aıynda ótetin ulttyq biryńǵaı testileý (UBT) bastaldy. Atalǵan testileý 30 naýryzǵa deıin jalǵasady.
UBT-ǵa tirkelý 10 naýryzǵa deıin Ulttyq testileý ortalyǵynyń app.testcenter.kz. saıtynda nemese UTO qosymshasy arqyly júrgiziledi. Ulttyq testileý ortalyǵynyń habarlaýynsha, qazirdiń ózinde 110 myń adam UBT-ǵa qatysýǵa ótinish bergen eken. Testileýge tirkelý ýaqyty áli aıaqtalmaǵanyn eskersek, úmitkerler sany áli de artýy múmkin.
Naýryzdaǵy UBT-ǵa shartty túrde aqyly negizde kúndizgi oqý nysany boıynsha joǵary oqý oryndaryna qabyldanǵan, ótken jylǵy mektep jáne kolledj túlekteri, Qazaqstan azamaty bolyp tabylmaıtyn ulty qazaq tulǵalar, sondaı-aq mektep bitiretin túlekter joǵary oqý oryndaryna aqyly negizde túsý úshin qatysady. Qatysýshylar testileý ótkiziletin oryndy, kúndi jáne ýaqytty ózderi tańdaıdy.
UBT-daǵy pánderdiń sany ózgerissiz qaldy, ıaǵnı úsheýi mindetti jáne ekeýi tańdaý boıynsha. Alaıda «Oqý saýattylyǵy» men «Matematıkalyq saýattylyq» mindetti pánderinen tapsyrmalar sany 5 suraqqa qysqardy. Al beıindi pánderdiń suraqtar sany artyp, 40 test tapsyrmany qamtydy. Atap ótsek, beıindi pánderde berilgen tizimnen sáıkestikti anyqtaýǵa arnalǵan 5 tapsyrma qosyldy.
Osylaısha, UBT tapsyrmalar sany ózgerissiz qalady, jalpy 120 suraqty qurady. Sonyń ishinde «Qazaqstan tarıhynan» 20 tapsyrma, «Oqý saýattylyǵynan» 10 tapsyrma, «Matematıkalyq saýattylyqtan» 10 tapsyrma jáne eki beıindi pán boıynsha 40 tapsyrma. Joǵary ball – 140, bul da ózgerissiz qaldy. Testileý ýaqyty – 4 saǵat (240 mınýt). Aıta keteıik, erekshe bilim berý qajettilikteri bar balalar úshin usynylatyn qosymsha 40 mınýt ýaqyt saqtalady.
10 aqpanda qańtar UBT-sy aıaqtaldy, jyl basyndaǵy testileýge 134 myńǵa jýyq adam qatysty. Onyń ishinde talapkerlerdiń 76,4%-y qazaq tilinde, 23,5%-y orys tilinde, 83 adam aǵylshyn tilinde testileýden ótti. UBT bastalǵaly shekti upaıdy 77,5%-ǵa jýyq talapker jınady. Ortasha upaı sany 69-dy qurady. Eń joǵary ball – 137. Jalpy, 72 talapker 130-dan joǵary upaı jınady.