Germanııada ótken ITB Berlin-2024 týrıstik kórmesi kezinde «Kazakh Tourism» UK» AQ men Mastercard kompanııasynyń jetekshilerimen kezdesip, Mastercard týrıstik ınnovasııalar ortalyǵynyń músheligine qol jetkizdi. Osy arada ITB Berlin – týrızm salasynda búkil álemdi qamtıtyn basty da yqpaldy halyqaralyq forýmy ekenin eske sala ketken jón.
Osy kórmede eki tarap ótken jyldyń qyrkúıeginde Qazaqstan Prezıdentiniń AQSh-qa saparynda jasalǵan Mastercard digital Country Partnership besjyldyq kelisimniń basym baǵyttarynyń biri – týrızmdi damytý jónindegi yntymaqtastyqtyń keleshegin talqylaǵan.
Memlekettik sektor boıynsha jahandyq basshy, Mastercard strategııalyq ósý jónindegi atqarýshy vıse-prezıdenti Nıkola Vılla, «Kazakh Tourism» UK» AQ basqarma tóraǵasy Qaırat Sádýaqasovty, Mastercard elimizde sheteldik jáne ishki týrızmdi damytý boıynsha seriktes bolýǵa, Priceless.com. platforma arqyly álemde 3 mıllıardtan astam Mastercard shottarynyń ustaıtyndar arasynda týrıstik baǵyt retinde túrli baǵdarlamalardy iske asyrýda tehnologııalar, jahandyq saraptama men qoldaýǵa jáne Qazaqstandy ilgeriletýge daıyn ekendigi týraly habardar etti. Kezdesý barysynda yntymaqtastyqtyń ózge baǵyttary men jobalary da talqylandy.
Osylaısha, iri kórme aıasynda «Kazakh Tourism» UK» AQ men Mastercard arasynda yntymaqtastyq týraly mámile jasaldy.
Qujat «Kazakh Tourism» UK» AQ-nyń Mastercard týrıstik ınnovasııalar ortalyǵyna (Mastercard Tourism Innovation Hub) – týrızmniń neǵurlym ornyqty, ıkemdi jáne ınklıýzıvti ındýstrııasyn damytý úshin Mastercard bastamasy boıynsha ázirlengen platformaǵa qosylýdy qarastyrady. Mastercard Tourism Innovation Hub músheligine jeke adamdar ǵana emes, memlekettik sektordyń ókilderi óte alady. Platforma týrızmge baılanysty yntymaqtastyq pen bilim almasýǵa yqpal etip, úkimetterdiń, bıznes, jergilikti qaýymdastyqtarmen qatar, saıahatshylardyń suranystaryn qanaǵattandyratyn sheshimder jasaýǵa kómektesedi.
Yntymaqtastyqtyń áleýetti baǵyttary týrıstik salanyń strategııasyn ázirleý úshin ınnovasııalyq tásilderdi paıdalanýdy, týrıstik baǵyttar men kommýnıkasııalardy brendteýdi, tanymal týrıstik marshrýttardyń sıfrlyq jáne tólem qyzmetterin damytýdy, týrıstik baǵyttardy damytýǵa arnalǵan ekologııalyq tásildi, resýrstardy turaqty basqarýdy, týrızm salasyndaǵy kadrlardy, qaýipsizdikti jáne jalpy damytýdy qamtıdy.
Sondaı-aq taraptar «Kazakh Tourism» UK» AQ-qa Mastercard, Tourism Insights Platform-ǵa qoljetimdilikpen birge, álemdik týrıstik taldaýlarǵa, onyń ishinde sapardy josparlaýdyń basynan bastap, ol aıaqtalǵannan keıingi keri baılanysty, saıahattyń árbir kezeńi boıynsha derekterge qoljetimdilikti usynýdy talqylady. Sonymen qatar júıe týrısterdiń jalpy sanyn, qansha kún bolatynyn, tanymal brondaý oryndary, shyǵyndardyń ortasha esebi men básekege qabiletti týrıstik naryqtarǵa baılanysty basqa da málimetter alýǵa múmkindik beredi.
«Qazaqstanda ekologııalyq týrızmnen iskerlik týrızmge deıingi barlyq túrin damytý úshin aıtarlyqtaı áleýetke ıe. Buǵan el aýmaǵyndaǵy arheologııalyq jáne tarıhı eskertkishterdiń baı tarıhy yqpal etedi. Mastercard-pen yntymaqtastyqtyń arqasynda biz saraptamalyq derekterge, ozyq halyqaralyq tájirıbege súıene otyryp, óz salamyzdy damyta alamyz», dedi Qaırat Sádýaqasov.
«Bizdiń qoldaǵy málimetterimiz koronavırýs pandemııasynan keıin týrıstik ındýstrııa burynǵy kórsetkishterge qaıta oralǵanyn, búkil álemde saıahat qaıta jandanǵandyqtan, jańa baǵyttar men baǵa jetpes tájirıbe jınaýdy qalaıtynyn kórsetip otyr. Qazaqstannyń týrızmniń barlyq túrin damytý úshin jetkilikti múmkindikteri bar jáne biz «Kazakh Tourism» ulttyq kompanııasymen jasalǵan kelisimniń arqasynda jýyq jyldarda eldegi týrıstik salanyń zor áleýetin iske asyra alatynyna senimdimiz», deıdi Nıkola Vılla.
О́z kezeginde, ITB Berlin kórmesi halyqaralyq týrızmniń qaı baǵytta damyp otyrǵanyn, negizgi tendensııalaryn kórsete alady. Kórme túrli semınarlar, sımpozıýmdar, sarapshylarmen kezdesýler, baspasózge arnalǵan dóńgelek ústelderi men ózge de is-sharalardan bólek, týrıstik ındýstrııanyń barlyq segmentterin usynyp – halyqaralyq týrızm federasııalaryn, ulttyq jáne aımaqtyq týrıstik uıymdaryn, kólik agenttikteri men týroperatorlardy, qonaqúıler, saqtandyrý kompanııalaryn, týrıstik agenttikter, qonaqúı menedjerlerin toǵystyrady.
Al Mastercard – jetekshi jahandyq tólem ǵana emes, tehnologııalyq kompanııa bolǵandyqtan, qazirgi tańda tólemderdi sıfrlandyrý esebinen damýdyń ekonomıkalyq ósýin yntalandyrýǵa baǵyttalǵan 60-tan astam elde 1600-den astam memlekettik jobalardy júrgizip jatyr.
Kompanııa Qazaqstanda 20 jyldan asa jumys isteıdi jáne qolma-qol aqshasyz ekonomıkany damytýǵa, álemdik tólem ınnovasııalaryn engizýge belsendi túrde septesip keledi.
ALMATY