Kún saıyn beleń alyp kele jatqan kıbershabýyl aqparattyq qaýipsizdiktiń dástúrli tásilderin qaıta qaraýǵa májbúr etip otyrǵanyn eshkim joqqa shyǵara almaıdy. Al ınternetke qosylǵan qurylǵylardyń sany eksponensıaldy jyldamdyqpen ósip kele jatsa, oǵan qosa alaıaqtar da qarap jatqan joq.
Osy oraıda «Kasperskıı zerthanasy» óziniń tehnologııalyq áriptesi – «TONK» kompanııalar tobymen kúsh biriktire otyryp, Ortalyq Azııa men Mońǵolııa aımaǵynda KasperskyOS operasııalyq júıesi men onyń negizinde kıberımmýndy juqa klıentti jetildirý jumystaryn jalǵastyryp jatqan-dy. Aqpan aıynyń aıaǵynda «Sıfrlyq Qyrǵyzstan 2024» forýmynda Kaspersky Thin Client 2.0 nusqasyndaǵy TONK TN1200 kıberımmýndy kompıýteri jurt nazaryna usynyldy.
«TONK TN1200 juqa klıenti – bul kásiporynnyń derekterimen, qosymshalarymen jumys isteý úshin jelige qosylatyn shaǵyn esepteýish resýrstary bar, ózimiz biletin úırenshikti kompıýterlerdiń jeńil nusqasy. Barlyq jumys úderisi, sonyń ishinde derekterdi saqtaý, syrtqy serverlerge tasymaldanady. Iаǵnı KasperskyOS bazasynda Kaspersky Thin Client sheshimderin biriktirý kıberımmýnmen qamtamasyz etpek, basqa tilmen aıtqanda, «týa salysymen» kıbershabýyldan qorǵaıdy.
Osyǵan oraı, elimizde ornalasqan «Kasperskıı zerthanasy» óńirlik keńsesiniń ókilderi de qanatqaqty jobany júrgizý úshin arnaıy oqytýdan ótken.
«Biz aımaqtaǵylardyń, ásirese qarjy sektorynyń kıberımmýndy qorǵanys pen sheshimniń jańa nusqasyna qyzyǵýshylyq tanytyp jatqanyn kórip otyrmyz. Bizdiń aımaqtaǵy bankter ónim týraly saýaldar qoıyp, ony kórsetý úshin mamandarymyzdy belsendi túrde tartyp jatyr», – deıdi Qazaqstan, Ortalyq Azııa men Mońǵolııadaǵy «Kasperskıı Zerthanasynyń» basqarýshy dırektory Valerıı Zýbanov.
Aqparattyq qaýipsizdik salasynda jumys isteıtin kompanııalar da kún saıyn jańa qorǵanys tehnologııalaryn ázirlep jatqanymen, ókinishke qaraı, kóp jaǵdaıda olar qaskóılerdi ókshelep qana kele jatyr. Al kıberımmýndyq dep te atalatyn bastapqy qaýipsiz (Secure-by-Design) AT-júıeleri men qurylǵylaryn jasaý órship turǵan kıbershabýyldar máselesin túbegeıli sheship, aqparattyq qaýipsizdiktiń kelbetin túpkilikti ózgertpek.
ALMATY