Memleket basshysy Qasym-Jomart Toqaev el damýynyń eń mańyzdy on baǵytynyń ishinde turǵyndardy baspanamen qamtamasyz etý máselesi bar. Ásirese onda jas mamandardy jan-jaqty qoldaýǵa qatysty da másele kóterilgen. Kúni keshe Ulys kúnine oraı jas medısına mamandaryna Buqar jyraý aýdanynyń Doskeı aýlynan 40 páterdiń kilti berilýi – sózimizge dálel.
Osy ýaqytqa deıin jas mamandarǵa arnalǵan baǵdarlama aıasynda aımaǵymyzda 600-den asa baspana berilgen. Keıingi bes jyldyqtyń kórsetkishi osylaı deıdi. Densaýlyq saqtaý basqarmasy jyl sońyna deıin taǵy 100 medısına mamanyn úımen qamtımyz dep otyr. Baspanamen qamtýdy josparlap otyrǵanyn basa aıtty. Bul jolǵy páter kiltin alǵan jas mamandardyń basym bóligi – №4 emhana, kópsalaly balalar aýrýhanasy men kópsalaly №1 aýrýhana dárigerleri.
– Mereke qarsańynda úlken qýanysh bolyp jatyr. Kez kelgen otbasy, onyń ishinde jastar úshin baspananyń orny erekshe. «Aı-haı meniń óz úıim, keń saraıdaı boz úıim» dep ósken qazaqtyń balasymyz ǵoı. Qýanysh qutty bolsyn! Jalpy, memleket tarapynan medısına salasynyń damýyna úlken basymdyq berilip jatyr. Basymyz aýyryp, baltyrymyz syzdasa eń aldymen dárigerge júginemiz. Ajaldan arashalap qalatyn, úzilgen úmitti qaıta jalǵaıtyn – dárigerler qaýymy. Sizderge degen qurmetimiz sheksiz, – dedi oblys ákiminiń orynbasary Erlan Beısembaıuly.
Beıbitshilik kóshesiniń boıynda bes qabatty eki úı qatar ornalasqan. Onyń bireýi – densaýlyq saqtaý salasynyń qyzmetkerleriniki, ekinshisi bilim salasynyń mamandaryna berilgen. Kezinde qaraýsyz qalǵan úı demeseńiz, irgetasy – berik, qabyrǵalar – túp-túzý. Arnaıy komıssııa quramynyń tekserisinen soń «jaramdy» dep tanylǵan.
Sodan soń kúrdeli jóndeý jumystaryn júrgizýge sheshim shyǵyp, tender oınatylyp, «GradStroıServıs» JShS utyp alady. Atalǵan merdiger qos úımen qosa, byltyr aýyldaǵy mektepke kúrdeli jóndeý jumystaryn jasaǵan. Oqý jylyna deıin oıdaǵydaı aıaqtap, qoldanysqa beripti.
– Qaraýsyz qalǵan úıge tolyq kúrdeli jóndeý jumystaryn júrgizip, ortalyq jylý jáne elektr jelisin tarttyq. Sý qubyryn júrgizip, úı ishine sý kirgizdik. Úıdiń syrtyn qaptap, shatyryn qaıta jasadyq. Jóndeý jumystary barysynda eshqandaı qıyndyqqa tap bolmadyq. Bilim salasynda qyzmet isteıtin mamandarǵa beriletin úıdiń jóndeý jumystary da tolyq aıaqtaldy. Endi syrtqy jumystary ǵana qalyp tur. Aldaǵy 15 kúnde aıaqtalady, – deıdi «GradStroıServıs» JShS ókili Berikjan Tólegenov.
Páter kiltin alǵan №4 emhananyń jalpy praktıkalyq dárigeri Jandos Káriqul – baspanaly bolǵandardyń ishindegi tájirıbesi jaǵynan eń jasy. Kezegin kóp kútpegen. Oqýyn támamdaı salysymen osy emhanaǵa jumysqa qabyldanǵan. Otbasymen eki jyl úı jaldap kelgen.
– Jastardy qoldaý maqsatynda qurylǵan baǵdarlamalar qatary arta bersin degim keledi. Sebebi qolyna dıplomyn alyp, jumysqa endi kirgen jas maman úshin qıyndyq kóp. Ásirese baspana – basty másele. Keıin jas dárigerlerge arnalǵan baǵdarlamanyń baryn estip, kezekke turdym. Mine, kezegimdi alty aı kútip, búgin úıli bolyp jatyrmyz. Jyl bizdiń otbasymyzǵa osyndaı kól-kósir qýanyshymen kelip jatyr, – degen rııasyz peıilimen bólisti Jandos Qýanyshuly.
Baspanaly bolyp, baqytqa kenelip jatqandardyń qatarynda №4 emhananyń II sanatty jalpy praktıkalyq dárigeri Shahrýh Týlametov ta bar. Túrkistan oblysynyń týmasy Shahrýh oqýyn támamdaǵan soń, ári qaraıǵy armanyn Qaraǵandyda jalǵastyrýdy uıǵarypty. Mine, eńbek jolyn bastaǵaly beri jeti jyl ótipti.
– 2009 jyly Qaraǵandy Memlekettik medısınalyq ýnıversıtetine oqýǵa túsip, ony oıymdaǵydaı támamdap, sosyn osy jaqta qaldym. Osydan bes jyl buryn shańyraq kóterdim. Eki balanyń ákesimin. Buǵan deıin úı jaldadyq. Búgin mereke qarsańynda úıli bolyp, qýanyshymyz eselenip jatyr. Páterge tolyq jóndeý jumystary jasalypty. Jap-jańa jıhazdary da bar. Biz sekildi jas mamandarǵa bul da – bir úlken kómek, – dep rızashylyǵyn jetkizdi Shahrýh Týlametov.
Bul – Doskeı aýylynda aq túıeniń qarny jarylǵan kún. Aýyl jurty da qushaqtaryn aıqara ashqan, el qosyldy dep. Endi jas mamandardyń shaǵyn aýdany bar. Bir-aq kúnde kórshi bolyp shyǵa kelgen jas mamandar endi kezek-kezegimen qonystoıyn dúbirletedi. Osylaısha, jańa jyl jastarǵa aıtarlyqtaı jaqsylyǵymen keldi.
Qaraǵandy oblysy