Ertede qystan din-aman shyqqan el-jurt, kórshi-qolań Naýryzda bas qosyp, amandyq, saýlyq surasatyn. Kóktemniń shapaǵatyn sezinip, qýanysyp qaýyshatyn kópshil qaýymnyń arasynda arazdasqandar ushyrasa qalsa tabysatyn.
Naýryzdyń mán-mazmuny – asta-tók dastarqan jaıyp, asyr salý emes. Súringenge demeý bolyp, taryqqan jandarǵa kómek qolyn sozý – atadan daryǵan qasıet. Qazir de qys qursaýynan shyqqan mezgil, jyl basy qaıyrymdylyq is-sharalarymen jalǵasatyn jaqsy dástúr qalyptasty.
Merekege oraı elordada 200-ge jýyq is-shara ótedi dep aldyn ala josparlandy. 15 naýryzda qalada qaıyrymdylyq kúni óz deńgeıinde toılanyp, Almaty aýdanynyń kommýnaldyq qyzmetkerleri ystyq shaı-baýyrsaq, naýryzkójeden dám tatyp, shat-shadyman bolysqan. Sol sekildi «Janashyr» qarttar úıinde, №2 kópshilik kitaphanada, Qýyrshaq teatrynda, «Jastar» teatrynda mazmundy jıyn ótip, qaırymdylyq kúni E.Rahmadıev atyndaǵy memlekettik akademııalyq fılarmonııada «Naýryz aıy týǵanda» konsertimen túıindelgen. Osy kúni shaharda myńǵa jýyq muqtaj otbasyǵa azyq-túlik sebeti tapsyrylǵan. Qaıyrymdylyqtan «Astana jastary» jastar resýrstyq ortalyǵynyń volonterleri de qalys qalmaı, belsendi jastar turǵyndarǵa baýyrsaq pen túrli táttiler taratqan. Merekede Nura aýdanynyń bastamasymen elordada «Armandar shańyraǵy» áleýmettik aksııasy ótti. Aksııada elordalyq mesenattar, kásipkerler Nura aýdanyndaǵy 70 balanyń armanyn oryndap, olarǵa syılyq úlestirdi.
Naýryznama onkúndiginde «Qazaqstan halqyna» qoǵamdyq qory 20 myń oqýshyǵa demalys oryndaryna joldama berip, balalardy qýantyp tastady. Mundaı múmkindikke eldegi barlyq aýyl mektebiniń (6 myńǵa jýyq aýyl mektebi) oqýshylary iligipti. Qor osy izgi bastamany abyroıly oryndaý úshin 2 mlrd teńgege shamalas qarjy jumsaǵan. Sonymen qatar balalar eldegi eń jaqsy degen demalys oryndaryna eki aptaǵa saıahattaıdy.
Balalar úıindegi balǵyndardy qýantýǵa baryp, qaıyrymdylyq jasaǵandar kóp. Al jastar jaǵy qarttar úıindegi nemese jalǵyz ózi turatyn qarııalarǵa járdemdesip, batasyn aldy. Kópti kórgen, kópti túıgen qarııalarǵa baryp, taǵylymǵa toly oqıǵalaryn tyńdaýǵa jastar da qulshynady. Munyń barlyǵy – jýannyń jińishkerip, jińishkeniń úziler shaǵynda jasalǵan ıgi isterdiń bir bóligi ǵana. Qaltaly azamattar men qarapaıym turǵyndardyń bylaıǵy kúnderi jasap jatqan qaıyrymdylyq kómekterin tizbektep shyǵý múmkin emes. Qalaı degende de Naýryz toıynan bastalǵan is-sharalardyń legi jyl sońyna deıin jalǵasatynyna esh kúmán joq.