Ulystyń uly kúnin bıyl Amal merekesimen bastalǵan Naýryzdy búgin qaraǵandylyqtar aıryqsha atap ótti. Qaraǵandydaǵy ortalyq saıabaqta aqshańqan aq úıler tizbekpenen qurylyp, ulttyq bolmys saltanat qurdy. Mundaı merekelik dýman aýdan-qalalarda da aýqymdy kórinis tapty, dep jazady Egemen.kz.
Kópshilik qaýymǵa arnap, qaraǵandylyq ónerpazdar «Armysyń, áz Naýryz!» atty merekelik teatrlandyrylǵan qoıylym usyndy.
Q.Baıjanov atyndaǵy «Arqa sazy» folklorlyq ansambliniń toı bastar ánimen bastalǵan merekelik is-shara «Qus qanatyndaǵy Naýryz» atty teatr qoıylymymen jalǵasty.
Ármen qaraı «Araı» ansambliniń ánshileri án-jyrmen shashý shashty. Halyqaralyq baıqaýlardyń laýreaty, «Daryn» memlekettik syılyǵynyń ıegeri, «Golos» jáne «Slavıan bazary» halyqaralyq baıqaýynyń júldegeri, Ámre atymen kópshilikke tanylǵan Ernar Sádirbaev óner kórsetti.
«Azııa daýysy» festıvaliniń jeńimpazy, dara daryn ıesi Baýyrjan Isaev ta meımandardy merekemen quttyqtap, án shyrqap berdi.
Qaraǵandylyq dızaınerlerdiń «Nauryz - Fashion» atty sán kórmesi de kópshilikti qyzyqtyrdy.
Dýmandy kesh Qalı Baıjanov atyndaǵy konserttik birlestik ázirlegen merekelik baǵdarlamamen jalǵasty.
Merekelik dýmanda oblys ákimi Ermaǵanbet Bólekpaev ár qurylym, uıym qurǵan kıiz úılerdi aralap, meımandardy Ulystyń uly kúnimen quttyqtady.
Ulttyq sport túrlerinen saıystar uıymdastyryldy. Kıiz úıde kilem toqý, kıiz basý sekildi sheberlik sabaqtary ótti. Osylaısha, Kenshiler astanasynda tól merekemiz tórge ozýda.