26 naýryz kúni Batys Qazaqstan oblysynda toqtaýsyz jańbyr jaýyp, bir táýlik ishinde bir aılyq mólsher – 25,6 mm jaýyn-shashyn tústi. О́ńirde qurylǵan jedel shtab táýlik boıy jumys istep, zardap shekkenderge kómek kórsetip jatyr. Sý tasqynynyń aldyn alý jumysyn óńir basshysy Narıman Tóreǵalıev ózi qadaǵalap otyr.
26 naýryz kúni Oral qalasynda jáne oblystyń 9 aýdanynda toqtaýsyz jańbyr jaýyp, qardy eritip jiberdi. Nátıjesinde, Aqjaıyq, Bórli, Báıterek, Qaztalov, Qaratóbe, Syrym, Tasqala, Terekti jáne Shyńǵyrlaý aýdandarynda tasqyn sý basý qaýpi týdy. Qar men jańbyr sýy aryqtar men kárizderge tolyp, 3 áleýmettik nysannyń jáne kópqabatty 5 úıdiń jertólesine quıylyp, 298 jekemenshik úıdiń aýlasyn basty. Qaýip tóngen aımaqtarǵa qum salynǵan qapshyq jetkizilip, sýdy sorý jumysy uıymdastyrylǵan.
Batys Qazaqstan oblysynyń ákimi Narıman Tóreǵalıev Oral qalasynyń Zashaǵan kentindegi sý basý qaýpi bar shaǵyn aýdandarǵa, Saratov tasjolyndaǵy sý arnasy júıesine, sondaı-aq Oral qalasynyń eski ortalyq kóshelerine baryp, jaǵdaıdy kózimen kórdi. Tótenshe jaǵdaılar departamentine, qala ákimdigine jáne kommýnaldyq qyzmet salasynyń mamandaryna qar, jańbyr sýlaryn ýaqtyly shyǵarý, joldardy bógeý, qapshyqtarmen qum tóseý, sý arnalary men qubyrlardy tazalaýdy tapsyrdy. О́ńir basshysy Oral qalasynyń ákimine jumysyndaǵy olqylyqtar úshin qatań sógis beretinin aıtty.
«Sizder sý tasqynyna daıyn bolmadyńyzdar. Tipti qala ákimdiginiń ǵımaraty da sýǵa batty. Munyń bári jaýapsyzdyqty kórsetedi. Keshe-búgin qalany araladym, keıbir shaǵyn aýdanda men kelgende jumys endi ǵana bastalyp jatyr. Oral ákimine qatań sógis jarııalaımyn. Qala men aýdandar kúsheıtilgen rejimde jumys isteýi kerek. Jaǵdaıdy táýlik boıy baqylaýda ustańyzdar», dep eskertti oblys ákimi.
Qarǵyn sý avtokólik joldaryna da qaýip tóndirip jatyr. Kúre joldardyń 19 jerinde osyndaı jaǵdaı tirkelgen. Respýblıkalyq jáne oblystyq dárejedegi 2 joldyń, aýdandyq dárejedegi 17 joldyń ústinen sý ótip ketken. Aqjaıyq, Jánibek, Terekti, Syrym jáne Qaratóbe aýdandaryndaǵy sý basqan joldarǵa kezekshilik, arnaıy belgiler ornatylǵan.
Naýryzdyń 27-sine aýǵan túngi saǵat 12.00-de oblystyq jedel shtab bastyǵy, oblys ákiminiń orynbasary Qalııar Aıtmuhambetovtiń tóraǵalyǵymen jıyn ótip, aýdan basshylarynyń sý tasqynynyń aldyn alý boıynsha esebi tyńdaldy. Joǵaryda aıtylǵan áleýmettik mekemeler men turǵyn úılerdiń jertólesine kirgen sý toqtatylyp, tóngen qaýiptiń beti qaıtqan.
Qaratóbe men Syrym aýdandarynda qalyptasqan kúrdeli jaǵdaıǵa baılanysty qosymsha kúsh jumyldyrylyp jatyr.
«Qazgıdromet» mekemesiniń málimetine qaraǵanda, Tasqala aýdanynda Ekinshi Shejin jáne Derkól ózenindegi sý deńgeıi kóterilgeni baıqalǵan. Jol-jónekeı qosylǵan sýlardan ózen kemerinen asyp ketýi múmkin. Ekinshi Shejinniń qaýipti deńgeıi 780 sm bolsa, qazir bul 739 sm-ge jetip qalǵan. Jergilikti ákimdik 5 myń dana qapshyq, 100 tonna ınertti materıal daıyndap, saqadaı saı otyr. Aýylda qaýipti jaǵdaı týsa, turǵyndardy kóshirip ornalastyrý úshin 2 evakýasııalyq beket ázirlengen.
Keıingi málimetterge qaraǵanda, oblys aýmaǵynda 131 616 tekshe metr sý sorylyp, qum salynǵan qapshyqtyń 5 730 danasy qaýipti jerlerge tóselgen. Bir mezgilde túrli qyzmetten 990 adam, 222 tehnıka, 153 motosorǵy tasqynnyń betin qaıtarýǵa jumyldyryldy. Aıta keteıik, qutqarý jumystarynyń alǵy shebinde áskerı bólim sarbazdary da júr.
Keı jerde avtojoldardan sý ótkenin aıtqan edik. Bular – Aqjaıyq aýdanynyń Qýraılysaı aýyldyq okrýgindegi Átibek qystaǵy mańynan ótetin «Juban – Saıqudyq» avtojolynyń 7-shi shaqyrymy, Jánibek aýdanynyń Jaqsybaı aýyldyq okrýgindegi «Jánibek – Talovka – Kishiózen» avtojolynyń 3 oıpatty ýchaskesi, Terekti aýdanynyń Shalqar aýyldyq okrýgindegi Saryómir aýlynan 9 shaqyrym jerde, «Saryómir – Dýana» avtojolynyń 2 oıpatty ýchaskesi, osy aýdannyń Ańqaty aýyldyq okrýgindegi Qandyq aýly mańyndaǵy «Saryómir – Ańqaty» avtojoly jáne «Terekti-Aqsaı» avtojolynyń 19 shaqyrymy. Qazir Dýana aýlymen kólik baılanysy joq. Qalǵan eldi mekenderge aınalma joldar bar, turǵyndarǵa qaýip tónbegen. Joldyń qaýipti tustaryna arnaıy belgi ornatylyp, kezekshi qoıylǵan.
27 naýryz kúni Terekti aýdanyna qarasty Ańqaty aýlynda 16 turǵyn úıge sý kirip, sondaı-aq 8 aýla aýmaǵyn sý basqany habarlandy. 27 turǵyn mektep-ınternat ǵımaratyna kóshirilgen. Úı janýarlary men qustar qaýipsiz jerlerge shyǵarylǵan.
«Sý deńgeıin túsirý jáne qaýipsizdikti qamtamasyz etý úshin joldyń jabyny alyndy. Oqıǵa ornynda TJD jeke quramynan 21 adam, 4 birlik tehnıka, 2 motopompa jáne 1 qaıyq, sondaı-aq jergilikti atqarýshy organdardan 12 adam, 3 birlik tehnıka, polısııa departamentinen 2 adam, 1 birlik tehnıka jumyldyryldy. Oblystyq tótenshe jaǵdaılar departamenti bastyǵynyń mindetin ýaqytsha atqarýshy polkovnık Rýslan Qasybaev sol jerde júr», dep habarlady baspasóz qyzmeti.
Batys Qazaqstan oblysy