Batys Qazaqstan oblysynda polısııa qyzmetkerleri kóktemgi sý tasqynynan zardap shekken aýdan turǵyndaryna kómek berý jumystaryn jalǵastyryp jatyr. Oral qalasyna jáne oblystyń 4 aýdanynda kóktemgi sý tasqynyna baılanysty jergilikti aýqymdaǵy tabıǵı sıpattaǵy tótenshe jaǵdaı jarııalanǵanyn budan buryn habarlaǵan edik.
Oblystyń birqatar óńirinde qardyń qarqyndy erýinen jáne birneshe kún jaýǵan jaýyn-shashyn saldarynan eldi mekenderdi sý tasqyny basyp ketti. Osyǵan oraı Premer-mınıstrdiń birinshi orynbasary Roman Sklıar Batys Qazaqstan oblysyna arnaıy issaparmen keldi. Roman Sklıar oblys ákimi Narıman Tóreǵalıevpen birge sý tasqyny bolǵan aýmaqtardy tikushaqpen aralap, jaǵdaıdy óz kózimen kórdi.
Qazirgi ýaqytta oblystyń Terekti, Syrym, Qaratóbe, Bórli aýdandarynda 1065 adam evakýasııalanyp, qaýipsiz jerge ornalastyryldy.
Alǵashqy kúnnen bastap polısııa qyzmetkerleri tilsiz jaýmen kúreste aldyńǵy shepte júr. Qazir olar turǵyndary evakýasııalanǵan eldi mekenderdegi azamattardyń múlkin qorǵaý úshin táýlik boıy kezekshilik ornatqan. Sondaı-aq, Qaratóbe jáne Shyńǵyrlaý aýdandarynyń polısııa qyzmetkerleri qaıyrymdylyq kómek kórsetip jatyr. Sý tasqynynan zardap shekken otbasylardy azyq-túlikpen, qajetti kerek-jaraqtarymen qamtamasyz etýge de qol ushyn sozǵan.
Jergilikti ákimdikter, polısııa jáne tótenshe jaǵdaılar organdary sý basqan nysandardy tazartý, adamdardy qutqarý boıynsha jan-jaqty shara qoldandy.
Qazir Batys Qazaqstan oblysynda 17 eldi mekenge baratyn joldy sý basty. Onyń ishinde 3 oblystyq jáne 16 jergilikti mańyzy bar avtojoldar búlindi. Bul aımaqtarda jol qaýipsizdigin qamtamasyz etý úshin oblystyq polısııa departamentiniń patrýldik polısııa batalony qyzmetkerleri stasıonarlyq beketter ornatyp, kúni-túni kezekshilikte tur.
«Jalpy sý tasqynynan qorǵaý jumystaryna 88 polısııa qyzmetkeri men 40 qyzmettik tehnıka jumyldyryldy», dep habarlaıdy BQO PD baspasóz qyzmeti.
Budan buryn habarlaǵandaı, óńirge Mańǵystaý oblysynan, Tótenshe jaǵdaılar mınıstrliginen áskerı bólim kúshteri, Ulttyq qaýipsizdik komıtetiniń Shekara qyzmetinen «MI-8» tikushaqtary kómekte júr.
Batys Qazaqstan oblysy