Sırek kitaptar men qoljazbalar qory jaqynda birqatar kóne muramen tolyqqanyn málimdedi Ulttyq ortalyq qyzmetkerleri. Majarstan ýnıversıtetiniń doktoranty, bolashaq tarıhshy, etnograf Nazıra Ábdinasyrqyzy Ulttyq ortalyq qoryna atasynyń jeke qorynda saqtalǵan kitaptaryn tartý etti.
Tabystalǵan ádebıetter ishinde Shyǵys shaıyrlarynyń biregeıi sanalatyn ózbek halqynyń uly aqyny Álisher Naýaıdyń shyǵarmalary, Shyǵys ádebıetiniń jaýharyna jatatyn Fızýlıdiń «Láıli men Májnún» poemasy, KSRO Ǵylym akademııasy baspasy 1952 jyly shyǵarǵan túrki jáne mońǵol taıpalary týraly áńgimelerdiń qysqasha mazmuny berilgen Rashıd-ad-dınniń «Shejireler jınaǵy» eńbegi, akademık Vasılıı Bartoldtiń 1966 jyly jaryq kórgen shyǵarmalarynyń IV tomy (onda arheologııa, nýmızmatıka, epıgrafııa jáne etnografııalyq dúnıeler toptastyrylǵan), sondaı-aq ıslamnyń paıda bolýynan bastap búginge deıingi negizgi musylman áýletterine sholý jasalyp, halıfalar, sultandar, bıleýshiler tizimi, bılik etken jyldary kórsetilgen Klafford Edmýnd Bosvorttyń «Musylman áýletteri. Hronologııa jáne shejire anyqtamalyǵy» jáne basqa da sırek kitaptary bar.
Bul kitaptar 1930 jyly Túrkistan oblysynyń Baltakól aýlynda dúnıege kelgen Ábdinasyr Seıitjanovtyń jeke qorynan alyndy. 1987 jyly 57 jasynda Tashkenttegi ámbebap kitaphanada dúnıeden ótken ol 70-ten astam qoljazbalar men shyǵystaný boıynsha 1300-ge jýyq kitap jınaǵan eken.