Elimizde shaǵyn jáne orta bıznes salasynda eńbek etetin áıelderdiń úlesi 43 paıyzdan asyp otyr. Abaılyq jeke kásipker Álııa Jumataevany osy qatarǵa jatqyzýǵa ábden bolady.
Qyzyljar óńiriniń týmasy E.Bóketov atyndaǵy Qaraǵandy ýnıversıtetiniń ekonomıka fakýltetine oqýǵa túsip, 1994 jyly bitirgennen keıin mamandyǵy boıynsha elde jumys isteıdi. 2008 jyly otbasymen Abaı qalasyna kóship keledi. Shaǵyn qalanyń jaılylyǵyn sezingen olar birjola ornyǵady. Jubaıy Saılaý «Abaı» shahtasyna jumysqa turyp, ózi kásipkerlikpen aınalysýǵa nıet etedi.
Álııa oıǵa alǵan josparyn 2015 jyly júzege asyrdy. Bıznes-jospary ákimdik tarapynan qoldaý taýyp, 1,8 mıllıon teńge grantqa qol jetkizedi. Memlekettiń qarajatyna Topar jylyjaılarynan sańyraýqulaq sehyn jalǵa alady. О́ziniń týǵan ólkesi Soltústik Qazaqstan sańyraýqulaqtyń shanterella, rossýla, baldyrkók sekildi túrlerine óte baı. Al jańa qonys aýdarǵan qaladaǵy dúken sórelerinen polıak shampınonynan basqasyn tappaı, tańǵalǵany bar. Bul kásip túri sol kezde oıyna kelip, sańyraýqulaqtyń túr-túrin osy jerde de ósirý maqsatymen jumysqa kirisip ketedi.
Saratov qalasynda bilimin jetildirip, Almatydan arnaıy tehnolog shaqyrtady. Birte-birte sharýasy dóńgelep, kásippen jeti jyl aınalysady. Alaıda jyl saıyn ósken seh aqysyn tóleý qıynǵa soǵyp, kásibin toqtatý týraly sheshim qabyldaıdy.
Álııanyń sańyraýqulaqtaryna ábden suranys artyp, ony ósirýdiń joldaryn suraýshylar kóbeıedi. Bilgenimen bóliskendi o bastan jón kóretin jan «Atameken» kásipkerler palatasy arqyly «Qalalyq fermer» oqý ortalyǵyn ashyp, isin jańa bastaǵandar men tájirıbesi az kásipkerlerge jylyjaı sharýashylyǵyn júrgizýdiń qyr-syryn úıretedi. Qazir de osyndaı ıgi ispen aınalysady. Máselen, ótken jyldyń maýsymynda 17 tyńdaýshy osy kýrsty bitirip shyǵyp, kásipterin ilgeriletip otyr. Jylyjaıǵa yqtımal qaýipter, fors-majorlyq jaǵdaılar, dempıng, ósimdik aýrýlary týraly dárister oqyp beredi. Tipti bıznes-jospar úlgilerin usynady, kópjyldyq tájirıbesimen bólisedi.
Munymen qosa jylyjaıdyń jumysy óziniń súıikti hobbıine aınalyp ketkendikten, áýeldegi isin jalǵastyryp, 2020 jyly Abaı qalasyndaǵy burynǵy shahtaqurylys basqarmasynyń qańyrap, qıraǵan jylyjaıynyń ǵımaratyn senimdik basqarýǵa alady. Aýmaǵy 1 myń sharshy metr bolatyn ǵımarattyń saý-tamtyǵy qalmaǵan eken. Áýelgi jumysty sony qalpyna keltirýden bastaıdy. Sýyn, jylýyn, elektr jelileri men toraptaryn qaıta jalǵatyp, qostyrýǵa qanshama kúshin sarp etedi.
«Osynyń negizinde 2022 jyly «Agrohorvest» jekemenshik kásipornyn qurdym. Búginde kásiporynda alty adam eńbek etedi. Munda qyzǵaldaq, qııar, kókónis ósiremiz. О́tken jyly 10 myń tal qyzǵaldaq, 3 tonna qyzanaq pen 20 tonna qııar óndirip, tutynýshylarǵa jóneltip, táýir tabys túsirdik. Byltyr oblys ákiminiń 3,8 mıllıon teńge grantyn utyp aldym. Osy qarajat esebinen óndiris kólemin ulǵaıtýdy oılastyryp otyr. Maqsatym – tek tabysqa kenelý emes, halyqty sapaly ónimdermen qamtamasyz etý», deıdi Álııa.
Kásipker kelinshek – otbasynda aıaýly ana, adal jar. Úıdegi úsh balasynyń babyn taýyp, odan bólek aýdannyń qoǵamdyq ómirine de belsene aralasyp, óńir ómirine úlken úlesin qosyp júr. Qaıyrymdylyq aksııalarynan da qalys qalmaıdy. Máselen, «Járdem» múgedekter qoǵamyna kómektesip, kembaǵal jandardyń ataýly kúni 9 qazanda olarǵa arnap dastarqan jaıady. Jylda bul daǵdysynan aınyǵan emes. Kásipkerdiń taǵy bir tamasha qyry – ústel tennısinen sport sheberligine úmitker. Oblystyq jarystarda Abaı aýdanynyń namysyn qorǵaıdy. Sporttan da, kásipkerlikten de alǵan Alǵyshattary men marapattary sóresinde syńsyp tur. Ol – bastysy eńbekten qashpaıtyn, erik-jigeri mol táýekelshil jan. Qaı sharýaǵa bolsyn bel býyp, maqsatyna jetkenshe tynym tappaıdy. Sol táýekeli túbi tabys ákeletinin jaqsy túsinedi.
Qaraǵandy oblysy,
Abaı aýdany