L.N.Gýmılev atyndaǵy Eýrazııa ulttyq ýnıversıtetiniń doktoranty Asyltas Qaltenova sheteldikterge qazaq tilin úırenýge kómektesetin «Sana» qosymshasyn ázirledi.
Biregeı qosymsha qazaq tilindegi kúndelikti qoldanýǵa arnalǵan dıalogter men olarǵa grammatıkalyq tolyqtyrýdy usynady. Jobany Eýrazııa ulttyq ýnıversıteti «Jana Asu» granty esebinen qarjylandyrdy. Ǵalymdar qosymshany kelesi jyly qoldanysqa engizýdi josparlap otyr.
«Elimizde qazaq tilin úırengisi keletin sheteldikter kóp. О́kinishke qaraı, bizdiń naryqta joǵary sapaly veb-resýrstar men qosymshalar az. Qoldanystaǵy baǵdarlamalar qazaq tiliniń grammatıkasy men leksıkasyn ǵana túsindiredi, al praktıkalyq sózder, sóz tirkesteri, dıalogter joq. Sondyqtan osyndaı olqylyqtyń ornyn tolyqtyrǵym keldi. Meniń maqsatym – qazaq tilin halyqaralyq deńgeıge shyǵarý jáne mundaı qosymshalar ana tilimizdi sheteldik qonaqtar arasynda dáripteýge septigin tıgizedi dep sanaımyn», deıdi A.Qaltenova.
Qazir IT-mamandary men ǵalymdar mobıldi qosymshanyń prototıpin jáne keshendi dıalogterdi ázirleýge kiristi. Baǵdarlamada grammatıkalyq jáne leksıkalyq túsiniktemelerden turatyn aýdıo nusqaýlyqtar qarastyrylǵan. Mobıldi qosymsha Android jáne iOS paıdalanýshylaryna qoljetimdi bolmaq.