Semeıde qurylys materıalyn shyǵaratyn zaýytta bes jumysshy jaraqat aldy, dep habarlaıdy Egemen.kz KTK telearnasyna silteme jasap.
Jumysshylardyń jaraqat alýyna seriktestik dırektory kináli dep tanyldy. Sebebi jumys berýshi kásiporyndaǵy qaýipsizdikti qamtamasyz etpegen.
Bir aı buryn qurylys materıaldaryn shyǵaratyn zaýytta qubyr jarylyp, ystyq sý atqylaǵan. Sol sátte jumysta bolǵan bes adam kúıip qalmas úshin ekinshi qabattan sekirip ketken. Terezeni syndyryp shyqqandardyń aıaq-qoly synyp aýyr jaralanǵan. Tipti dárigerler aýrýhana tósegine tańylǵan naýqastarǵa birneshe ret ota jasaǵan. Osydan keıin jábirlenýshilerdiń týystary óndiriste jaraqat alǵandarǵa basshylyq kómek kórsetpedi dep narazylyq tanytqan.
Tekseris júrgizgen komıssııa seriktestik dırektory «olqylyq jibergen» deıdi. Iаǵnı ystyq sý qubyrlaryn jańartqanda eshqandaı joba ázirlenbegen. Tipti tehnıkalyq sapasyna da mán berilmegen kórinedi. Dırektor jaraqat alǵan jumysshylardyń jalaqysymen qatar, barlyq shyǵynyn tóleýge mindetteldi, qylmystyq jaýapqa da tartylýy da múmkin.
«Bul jerde aıyppul qarastyrylmaǵan. Sebebi QR QK 156-baby boıynsha eńbek qorǵaý salasyndaǵy qatelikteri úshin qylmystyq jaýapkershilik qarastyrylady. Biz materıaldardy quqyq qorǵaý organdaryna jiberdik», dedi Abaı oblysy eńbekti qorǵaý jáne qaýipsizdikti baqylaý bóliminiń basshysy Toqtarbek Túsipbaev.