«Pavlodar-Túrkistan» baǵytyndaǵy jolaýshylar poıyzynyń eki jolserigi tolǵaǵy qysqan jolaýshy áıeldi aman-esen bosandyryp aldy, dep habarlaıdy Egemen.kz «Qazaqstan Temir Joly» kompanııasynyń baspasóz qyzmetine silteme jasap.
Aıy-kúni jetken Zeınep Ábdikárimova №46 poıyzǵa minip, anasymen birge Pavlodardan Túrkistanǵa attanyp bara jatqan. Kelinshek jolda tolǵata bastaǵan. Vagonnyń eki jolserigi Anar Amandyqova men Nazerke Talǵarbaeva áıeldi aman-esen bosandyryp, qajetti alǵashqy medısınalyq kómek kórsetti. Qyz bala 10 sáýirde saǵat 16:30-da dúnıege keldi.
«Poıyz brıgadasy jaqyn mańdaǵy stansııaǵa jedel járdem shaqyrǵan. Sary-Shaǵan stansııasyna jetkende, jas ana men qyz balany jedel járdem qyzmetkerleri qabyldap aldy. Jańa týǵan náresteniń esimin Mereke dep ataǵan», dep habarlady kompanııanyń baspasóz qyzmeti.
Aıta keteıik, sońǵy 3 jylda «Jolaýshylar tasymaly» AQ poıyzdarynda 13 sábı dúnıege kelgen.