Qasym-Jomart Toqaev Qostanaı obylysyna jumys sapary barysynda óńir turǵyndarymen kezdesti. Kezdesý barysynda Prezıdent aqbókenderdiń kóbeıýine tosqaýyl qoıatyn sheshimniń kúshi joıylatynyn málimdedi, dep habarlaıdy Egemen.kz.
Memleket basshysy Qostanaı oblysyna jumys sapary barysynda sý tasqyny saldaryn eńserýge járdemdesken bıznes ókilderimen jáne eriktilermen júzdesti. Kezdesýge óńirdegi mashına jasaý, taý-ken, tamaq jáne aýyl sharýashylyǵy ónerkásibi salalarynyń jetekshileri, Qazaqstan halqy Assambleıasynyń jergilikti ókilderi, oblystyq jastar resýrstyq ortalyǵynyń eriktileri jáne stýdentter qatysty. Qasym-Jomart Toqaev shaǵyn jáne orta bızneske qoldaý kórsetý basty mindet ekenin atap ótti.
«Osy kezdesýge biraz mesenat qatysyp otyr. Men sizderge rızashylyǵymdy bildiremin. Bul – sizderdiń júrek qalaýlaryńyz, azamattyq jaýapkershilikterińizdiń kórinisi. Munyń bárin marapat úshin emes, shynaıy nıetpen jasalǵan ıgi is dep bilemin», dedi Prezıdent.
Memleket basshysy sý tasqynynan zardap shekken halyqqa naqty kómek kórsetý isinde bıznesmenderdiń róli zor ekenine aıryqsha nazar aýdardy.
«Bizdiń elimizde Forbes tizimine kiretin iri kásipkerler bar. Olarmen arnaıy kezdesemiz. Olar ár oblysqa, aýdanǵa, eldi mekenge bekitiledi jáne naqty jaýapkershilik júkteledi. Bul bir jaǵynan kásipkerlerdiń múddesine saı keledi. О́ıtkeni olar ózderiniń qosqan úlesiniń naqty nátıjesin kóretin bolady. Halqyna qaıyrymdylyq jasaǵan azamat retinde Sizderdiń de esimderińiz memleket tarapynan eleýsiz qalmaıdy dep oılaımyn», dedi Qasym-Jomart Toqaev.
Sonymen qatar Prezıdent eriktilerge zor qurmetpen qaraıtynyn jáne jan-jaqty qoldaý kórsetetinin atap ótip, olarǵa rızashylyq bildirdi.
Osy kezdesýde «AgromashHoldıngKZ» AQ Prezıdenti Dınara Shúkijanova sý tasqynynan keıin qalaǵa qonys aýdarǵysy keletin adamdardy tehnıkalyq mamandyqtarǵa oqytyp, olardyń jańa ortaǵa beıimdelýine jan-jaqty qamqorlyq kórsetýge daıyn ekenin jetkizdi.
Sondaı-aq «Aıan-ozat» JShS dırektory Valerıı Rozýmovıch qıyn-qystaý kezeńde óńir kásipkerleri halyqqa barynsha járdem bergenin aıtty.
QHA oblystyq fılıalynyń qyzmetkeri Aıbek Tańatbaev sý tasqynynyń saldarymen kúreste eriktilerdiń eńbegi eren ekenin atap ótti.