Elordada Jas ǵalymdar sammıti ótti. Sammıt alańyna Ǵylym jáne joǵary bilim mınıstrliginiń ókilderi, jas ǵalymdar, doktoranttar, ǵylymı ortalyqtar men ýnıversıtetterdiń qyzmetkerleri, memlekettik sektordyń ókilderi, kásipkerler jınaldy.
Sammıttiń ashylýynda sóz alǵan Ǵylym komıteti basqarmasynyń basshysy Renat Elshıbekov jastardyń ǵylymǵa kelýine memlekettiń múddeli ekenin, soǵan saı erekshe qoldaý kórsetilip jatqanyna toqtaldy.
«Sońǵy jyldary elimizde ǵylymnyń damýyna aıtarlyqtaı nazar aýdarylyp otyr. Biz ǵylymdy qajetsinetin ekonomıka qurý jáne otandyq ǵylymdy júıeli damytý boıynsha belsendi jumysty kórip otyrmyz. Sońǵy 2-3 jylda ǵylym bıýdjeti birneshe ese ósti. Sonyń ishinde jas ǵalymdardy qoldaýǵa erekshe kóńil bólinip keledi. Jas ǵalymdar úshin arnaıy «Jas ǵalym» granttary bar. Kelesi úsh jyldyq kezeńde jas ǵalymdardyń zertteýleri úshin granttarǵa 18 mıllıard teńge bólý kózdelgen. Jyl saıyn álemniń jetekshi ǵylymı ortalyqtarynda 500 otandyq ǵalym taǵylymdamadan ótedi. 2023 jyly 809 ǵalymǵa álemniń jetekshi ortalyqtarynda ǵylymı taǵylymdamadan ótýge granttar berildi. Bul baǵyttaǵy jumys jalǵasyp jatyr. Ýnıversıtet ǵylymy da damyp keledi. JOO janynan ınjınırıng ortalyqtary men tehnoparkterdi qurýǵa 16 mlrd teńge bólindi», dedi R.Elshıbekov.
Komıtet ókiliniń aıtýynsha, ǵylymdy basqarý júıesin jetildirý, bıznesti yntalandyrý úshin jumystar júrgizilip jatyr. Atap aıtqanda, «Ǵylym jáne tehnologııalyq saıasat týraly» zań jobasy jáne «Kásipkerlik sýbektileri úshin ǴZTKJ-ǵa (ǵylymı-zertteý jáne tájirıbelik-konstrýktorlyq jumystar) shegerimder týraly zańnamalyq normalar ázirlendi. Qabyldanǵan sharalardyń nátıjeleri qazirdiń ózinde kórinip tur. 2023 jyly ǵylymı-zertteý qyzmetimen aınalysatyn qyzmetkerler sany, sondaı-aq Qazaqstan Respýblıkasynda ǴZTKJ shyǵyny artty.
Jıynda saıasattaný ǵylymyndaǵy PhD Jaqsylyq Sabıtov, akademık N.D.Batpenov atyndaǵy Travmatologııa jáne ortopedııa ulttyq ǵylymı ortalyǵy dırektorynyń orynbasary, PhD Arman Batpenov, qaýymdastyrylǵan professor Serik Orazǵalıev, Astana IT ýnıversıteti Ǵylym jáne ınnovasııa departamentiniń dırektory, PhD Nurhat Jakıev, «Ǵylym qory» AQ basqarma tóraǵasynyń orynbasary, PhD Alııa Sembaeva jastardy ǵylymǵa shaqyrý maǵynasynda baıandama jasap, jas ǵalymdarǵa arnalǵan memlekettik qoldaýdyń sharalaryn, túrleri men joldary jóninde keńinen tarqatty.
Sammıt barysynda «Jas ǵalymdardyń tájirıbesi: múmkindikteri men bolashaǵy» taqyrybynda sessııa ótti. Baıandamashylar túrli ǵylymı saladaǵy jetistikteri men ǵylymı jobalarymen bólisti. Talqylaý Qazaqstannyń ǵylymı qoǵamdastyǵyndaǵy jas ǵalymdardyń múmkindikteri men bolashaǵyn anyqtaýǵa, sondaı-aq el jastarynyń ǵylymı qyzmetin odan ári damytý joldaryn izdeýge baǵyttalǵan.