Parlament Senatynyń Tóraǵasy Máýlen Áshimbaev Oksford ıslamtaný ortalyǵynyń dırektory Farhan Ahmad Nızamımen kezdesti. Onda ǵylymı-zertteý baılanystary men rýhanı dıplomatııa salasyndaǵy yntymaqtastyqty nyǵaıtý perspektıvalary talqylandy, dep habarlaıdy Egemen.kz QR Parlamenti Senatynyń baspasóz qyzmetine silteme jasap.
Senat tóraǵasy Farhan Ahmad Nızamıge Qazaqstan ǵalymdarmen belsendi qarym-qatynasy úshin alǵys aıtyp, bul qazirgi zamannyń jahandyq máselelerin sheshý úshin eki eldiń ǵylymı qaýymdastyǵyn biriktirýdegi mańyzdy qadam ekenin atap ótti.
Ol Qazaqstannyń Oksford ıslamtaný ortalyǵymen yntymaqtastyq ornatýǵa múddeli ekenin jetkizdi.
«Qazaqstanda ótip jatqan álemdik jáne dástúrli dinder kóshbasshylarynyń sezi jıyrma jyl ishinde mádenıetter men órkenıetter arasyndaǵy dıalogty ilgeritetin bedeldi jáne moıyndalǵan halyqaralyq alańǵa aınaldy. О́tken jyly biz aldaǵy onjyldyqqa arnalǵan Kongressti damytý tujyrymdamasyn qabyldadyq. Bizdiń jumysymyz klımattyń ózgerýi, teńsizdik, ekstremızm jáne soǵysty qosa alǵanda, qazirgi álem aldynda turǵan eń ózekti máselelerdi sheshýge kómektesý úshin dinı jetekshiler, saıasatkerler jáne halyqaralyq uıymdar arasyndaǵy yntymaqtastyqty nyǵaıtýǵa baǵyttalǵan. Osy oraıda biz rýhanı dıplomatııanyń úlken áleýetin kórip otyrmyz, sondyqtan biz bul ortalyqpen osy baǵytta odan ári yntymaqtastyq ornatýǵa múddelimiz», dedi Máýlen Áshimbaev.
Farhan Ahmad Nızamı Máýlen Áshimbaevqa alǵys bildirip, eki el arasyndaǵy baılanysty odan ári nyǵaıtý men ǵylymı-zertteý yntymaqtastyǵyn nyǵaıtýǵa nıetti ekenin bildirdi.
Qyrmyzy JUMAǴALIQYZY,
EUÝ stýdenti