Sáýirdiń 21-i kúni Jaıyq ózeni Oral qalasynyń tusynda qaýipti deńgeıden asyp, 852 santımetrdi kórsetti. «Jaǵdaı óte kúrdeli, biraq tolyq baqylaýda», deıdi Tótenshe jaǵdaılar departamentiniń ókili.
Eń sońǵy aqparat boıynsha óńirde ózen boıynda ornalasqan 3 294 saıajaı úıin sý basqan, bul túske deıingi málimet. 13 819 adam qaýipsiz jerge kóshirildi. Onyń ishinde 5 725 bala, 19 múmkindigi shekteýli jan bar. Evakýasııalyq pýnktterde qazir 2 300 adam ornalasqan. 11 519 adam óz qalaýymen týystaryn panalap júr.
«Sońǵy táýlikte Jaıyq ózeni 24 sm-ge kóterildi. Tańǵy saǵat 8:00-de qaýipti deńgeıden 2 santımetrge asty. Sol sebepti jer bederi tómen núktelerde qaýiptiń beti seıilgen joq. Biz ol jerlerge aldyn ala qulaqtandyrý júrgizdik, áıelder men balalardy, qarttardy evakýasııa jasadyq. Qalǵan adamdardan da qaýipti aımaqtan óz erkimen ketýin suraımyz. Sý deńgeıi áli de kóterilip, 9 metrge jetýi múmkin. Oblys boıynsha jaǵdaı qazir óte kúrdeli, biraq qatań baqylaýda», dedi Batys Qazaqstan oblystyq Tótenshe jaǵdaılar departamentiniń resmı ókili Nurjan Tóleýish.
О́ńirde tasqynǵa qarsy jumys qyzý júrip jatyr. Qalanyń ózen jaǵalaýyndaǵy qorǵanys bógenderi nyǵaıtylyp, jańa bógender turǵyzylyp jatyr. Sońǵy táýlikte, 20-sáýir kúni ǵana oblys aýmaǵynda 81 myńnan asa qapshyq qum tóselgen eken. Al tasqyn bastalǵaly tóselgen qumnyń sany 1 173 myń qapshyqtan asyp ketken.
О́ńirde burynǵysha 9 eldimekenmen avtokólik qatynasy joq. Avtojoldardyń 20 bóligin sý shaıyp, buzǵan. Qazir ol jerler polısııa baqylaýynda tur.
Aıtpaqshy, qaýipti óńirlerden 4 925 úı janýary shyǵarylyp, baǵylyp jatyr.
Apattan qutqarý jumystaryna 10 663 adam, 1 927 tehnıka, 213 sý sorý quraly, 197 qaıyq jáne 5 tikushaq jumyldyrylǵan.
Sáýirdiń 21-i kúni ózen sýy qaýipti shekten asqan kezde osy kezge deıin adamnyń kúshimen ustap turǵan saıajaı qaýymdastyqtary birinen soń biri sýǵa kete bastady. Bul aımaqtyń turǵyndary bir apta buryn kóshirilgen. Dúnıe-múlkin kúzetip, ketpeı qalǵan keıbir turǵyndardy polısııa men qutqarýshylar eriksiz kóshirýge kiristi.
«Stenovık saıajaı qoǵamynda 820 ýchastok bolsa, osynda 190 otbasy qysy-jazy turaqty turady. Biz turǵyndardy bir apta buryn kóshirdik. Búgin ketpeı qalǵan sanaýly adamdy qarsylyǵyna qaramaı shyǵaryp jatyrmyz», dep habarlady Oral qalalyq Tótenshe jaǵdaılar basqarmasynyń bastyǵy Amangeldi Eshmuhanov.
Oral qalasynyń mańynda ornalasqan Kosmos jáne Komarov saıajaılarynda da osy kezge deıin úıinen ketýden bas tartqan jergilikti turǵyndar shuǵyl evakýasııalanyp jatyr. Osy saǵatta qutqarýshylar úıleriniń tóbesinde turǵan 4 turǵyndy qutqarypty.
«Azamattardy sý basqan aımaqtan evakýasııalaý operasııasyn Tótenshe jaǵdaı mınıstri Chıngıs Arınovtiń ózi úılestirip otyr», dep habarlady TJ baspasóz hatshysy. Qazir tikushaq áýege kóterilip, qutqarýshylar qaıyqpen, dronmen saıajaı aýmaǵynda júr.
21-sáýirde Zachagansk kenti aýmaǵyndaǵy «Kosmos», «Stenovık», «Otdyh», «Komarovo», «Ýralochka», «Dorojnık» saıajaılaryn sý basqany habarlandy. Bul jerde 820 saıajaı telimi bolǵan. 585 adam aldyn ala qaýipsiz jerge kóshirilgen.
Batys Qazaqstan oblysy