Úkimet basshysynyń orynbasary Tamara Dúısenova depýtattarǵa bergen jaýabynda qoǵamdyq mańyzy bar ádebıetterdi basyp shyǵarý jónindegi qaǵıdalarǵa ózgeris engiziletinin aıtty, dep habarlaıdy Egemen.kz.
Depýtat Aıdos Sarymnyń kitap oqý úrdisin damytý jóninde saýalynda otandyq kitap basyp shyǵarý isin sýbsıdııalaý formatyn ózgertýdi usynǵan edi. Depýtatqa bergen jaýabynda Tamara Dúısenova kitap isinde qoǵamdyq mańyzy bar ádebıetti satyp alý, basyp shyǵarý jáne taratý qyzmetin Mádenıet jáne aqparat mınıstrligi iske asyratynyn jetkizedi. Onyń aıasynda «Memlekettik kitaphanalarǵa jáne ózge de memlekettik uıymdarǵa taratý úshin qoǵamdyq mańyzy bar ádebıetke múliktik quqyqtardy belgili bir merzimge satyp alý jáne (nemese) ony basyp shyǵarý jónindegi qaǵıdalaryn» basshylyqqa alady.
– Qazirgi tańda atalǵan qaǵıdalarǵa tolyqtyrýlar men ózgerister engizý jumystaryn júrgizip jatyr. Jańa qaǵıda bekitilgennen keıin qalamgerler qalamaqy, qaıta basyp shyǵarý baǵyttarynan bólek jańa týyndysyn kitap retinde basyp shyǵaryp, kitap dúkenderine satylymǵa qoıýǵa grant alatyn bolady. Avtorlyq quqyǵy avtordyń ózinde qalady. Bul qalamgerler men baspagerlerge eleýli qoldaý bolmaq, – deıdi Dúısenova.
Saýalda salyq reformasy aıasynda kitap pen gazet shyǵarýshylardy 10 jyl merzimge salyqtan bosatý usynylǵan. Úkimet 2022 jyly avtorlardy, baspa jáne kitap satý mekemelerin qoldaý maqsatymen kitap shyǵarǵanda jáne satqanda salynatyn qosymsha qun salyǵyna (12%) jeńildikter engizý máselesi qaralǵanyn habarlaıdy. Alaıda bul bastama qarjy jáne ulttyq ekonomıka mınıstrlikteri tarapynan qoldaý tappaǵan.