Áskerı teńizshilerdiń áleýeti zor

Qarýly Kúshterdiń bul ásker túri batys strategııa­lyq baǵytynda qol suǵylmaý­shylyqty, elimizdiń aýmaqtyq tutastyǵyn qorǵaýǵa arnalǵan. Kaspıı teńiziniń qazaqstandyq sektoryndaǵy memlekettiń aýmaqtyq tutastyǵyn kózdiń qarashyǵyndaı qorǵaý, el ege­mendigi men ekonomıkalyq múd­delerin saqtaý syndy aýqym­dy mindetterdi oryn­­daıdy. Teńizde júzý­diń na­vıgasııalyq-gıdrogra­fııalyq qaýipsizdigin qamtama­syz etedi, Tótenshe jaǵdaılar mınıs­trliginiń qyzmetterimen birge izdestirý-qutqarý jumystaryn júrgizedi, memlekettik organ­darǵa tabıǵatty qorǵaý jáne baqylaý fýnksııalaryn jú­zege asyrý kezinde kómek kórsetedi.

Qazirgi kezeńde Áskerı-teńiz kúshterine jaǵalaýdaǵy baılanys, teńiz jaıaý áskerleri, arnaıy maqsattaǵy jáne qam­ta­masyz etý bólimsheleri kire­di. Áskerı kemeler zama­naýı qarý-jaraqpen jasaq­talǵan.

Bıyl «Birlestik-2024» oqý-jattyǵýyn ótkizý jospar­lanǵan. Jattyǵý barysynda teńizdegi kórinister, desant túsirý, birlesken artıl­le­rııalyq atystar men jaýyn­gerlik jattyǵýlar pysyqta­lady. Áskerı-teńiz kúshteriniń quramynda otandyq jáne sheteldik sońǵy úlgidegi kemeler bar. Eldiń qorǵanys-ónerkásiptik kesheni bul áskerdi zamanaýı tehnıkamen qamtamasyz etedi.

Byltyrdan beri Áýe qorǵa­nysy kúshteriniń ás­kerı ınstıtýtynda áskerı teńizshilerdi «áskerı istegi teńiz tehnıkasy jáne tehnologııalar» ma­man­dyǵy boıynsha daıarlaý júzege asyrylyp keledi. Teńiz mamandyǵynyń negizderin bolashaq shtýrmandar men mehanıkter Aqtóbe áskerı oqý ornyndaǵy áskerı-teńiz pánderi kafedrasynda, al beıindik pánderdi úshinshi-be­sin­shi kýrstarda – Aqtaý qala­synyń Sh.Esenov atyndaǵy Kaspıı tehnologııalar jáne ınjınırıng ýnıversıtetiniń bazasynda meńgeredi. Áskerı teńizshilerdi Aqtaý qalasy Áskerı-teńiz kúshteriniń oqý-jattyǵý ortalyǵynda da oqy­ta­dy, onda jas býyn keme qyzmetiniń uıymdas­tyry­lýymen jáne olardyń qury­lysymen tanysady.

Áskerı-teńiz kúshteri ofıserleriniń biliktiligin arttyrý jáne oqytý Germanııa, Qytaı, Reseı, AQSh, Túrkııa jáne Ońtústik Koreıanyń jetekshi áskerı oqý oryndarynda uıymdastyrylady.

Kásibı sheberlik, janqııar­lyq qyzmet jáne rýhtyń beriktigi – áskerı teńizshilerdi ereksheleıtin qasıetter. Olarǵa eldiń birligin, aýmaq­tyń tutastyǵyn jáne ekono­mıkalyq múddelerdi qorǵaý jóninde asa jaýapty mindetter júktelgen. Áskerı teńizshiler qurylǵan ýaqyttan bergi otyz jyldan astam ýaqyt ishinde qart Kaspııdiń atyrabynda uıymdastyrylǵan barlyq keshendi jattyǵýda ózderin bilikti maman retinde tanytty, júktelgen oqý-jattyǵý, jaýyngerlik mindetterdi abyroımen oryndady. Áskerı-teńiz kúshteri aldaǵy ýaqytta da Kaspıı teńizi sektorynda egemen elimizdiń tynyshtyǵy men qaýipsizdigin, táýelsizdigi men el tutastyǵyn saqtaý jolynda qapysyz qyzmet ete beretin bolady.