Memleket basshysynyń tapsyrmasy aıasynda Úkimet elimizdiń jylý elektr keshenin aýqymdy jańǵyrtý boıynsha jumystardy jalǵastyryp jatyr. Premer-mınıstr Oljas Bektenov Kentaý, Rıdder, Qyzylorda qalalaryndaǵy jylý kózderine rekonstrýksııa jáne kúrdeli jóndeý júrgizý úshin Úkimet rezervinen qarajat bólý týraly qaýlylarǵa qol qoıdy, dep habarlaıdy Egemen.kz Úkimettiń baspasóz qyzmetine silteme jasap.
Atap aıtqanda, Kentaýdaǵy JEO-5-tiń № 7, 8, 9, 10, 11 jáne 12 qazandyqtaryn rekonstrýksııalaýǵa 9 mlrd teńgeden astam, Rıdder jylý elektr ortalyǵynyń tehnologııalyq jabdyqtary men ınfraqurylymyna kúrdeli jóndeý júrgizýge 4,9 mlrd teńge, al Qyzylordadaǵy ońtústik qazandyqtyń úsh bý qazandyǵyn rekonstrýksııalaýǵa 2 mlrd teńgeden sál astam qarajat bólindi. Osylaısha, atalǵan jylý kózderin jańǵyrtýǵa jalpy somasy shamamen 16 mlrd teńge baǵyttaldy. Bul – kelesi jylytý maýsymynda atalǵan 3 qalanyń turǵyndaryn jylýmen turaqty qamtamasyz etýge múmkindik beredi.
Jalpy elimiz boıynsha aldaǵy jylytý maýsymyna daıyndyq sheńberinde Astana, Almaty, Shymkent, Atyraý, О́skemen, Qaraǵandy, Aqtaý, Taraz, Petropavl, Pavlodar, Jezqazǵan, Aqtóbe, Ekibastuz, Stepnogor, Rýdnyı, Balqash, Aqsý qalalaryndaǵy 10 energoblok pen 55 qazandyqqa jáne 45 týrbınaǵa jóndeý jumystaryn júrgizý josparlanyp otyr.
Sonymen qatar ınvestısııalyq kelisimder sheńberinde osy kúnderi Ekibastuzdaǵy GRES-1-diń №1 energoblogynda qalpyna keltirý jáne Atyraýdaǵy JEO men Topardaǵy GRES-te týrboagregattardy aýystyrý jumystary júrgizilip jatyr. Budan bólek, Ekibastuz GRES-inde №3 energoblok qurylysy, sondaı-aq О́skemendegi JEO men Qaraǵandydaǵy JEO-3-ti keńeıtý boıynsha jobalar josparlanǵan.
Joǵary atalǵan barlyq jobany júzege asyrý ortaq jıyntyǵy 1500 MVt-tan astam jańa qýatty iske qosýǵa múmkindik beredi.