QR Tótenshe jaǵdaılar mınıstri Shyńǵys Árinov «Biz birgemiz» jalpyulttyq telekópirine qatysyp, eldegi sý tasqyny jaǵdaıyna baılanysty aqparat usyndy, dep habarlaıdy Egemen.kz.
Mınıstrdiń aıtýynsha, Jaıyq boıyndaǵy 84 eldi mekendi sý basý qaýpi seıildi.
«Jaıyqtyń qaterli tolqyny Batys Qazaqstan óńirinen ótip, Atyraý oblysyna jyljydy. Dese de Jaıyq boıyndaǵy 84 eldi mekendi sý basý qaýpi joq. Aldyn alý sharalaryna der kezinde kiristik dep aıtsam artyq etpes. Búgingi kúnge deıin qanshama shaqyrym bóget salynǵanyn ózderińiz de kórdińizder. Búkil el bolyp jumylyp, arnaıy tehnıka, kúsh qurylymdary kelip jatyr. Eriktiler men ahýalǵa beıjaı qaramaıtyn azamattar da qarǵyn sýmen kúreske atsalysty», dedi Shyńǵys Árinov.
Osy tusta mınıstr osynaý qıyn sátte qalys qalmaı, zardap shekkenderge qol ushyn sozǵan barsha azamatqa alǵys aıtty.
«Osy sátti paıdalanyp, qutqarýshylarǵa, Qarýly Kúshterdiń, Ishki ister mınıstrliginiń, Ulttyq qaýipsizdik komıtetiniń, Memlekettik kúzet qyzmetiniń ókilderine, barlyq kúshtik qurylymdardyń sarbazdaryna rızashylyǵymdy bildiremin. Sondaı-aq qajetti jabdyqtar men arnaıy tehnıkalardy tasymaldaýǵa atsalysqan QTJ ulttyq kompanııasynyń ókilderine, tasqynmen kúreske atsalysqan adamdarǵa alǵysym sheksiz», dedi mınıstr.