Endi «Iаndeks» qosymshasynda qazaq tilinde daýystap suraq qoıýǵa bolady. Smartfonda daýystap suraq qoıý mátin terýden góri yńǵaıly.
Qarym-qatynas tilin aldyn ala tańdaýdyń qajeti joq. «Iаndeks» tipti orys jáne qazaq tilderin aralastyryp aıtsa da túsinedi. Ol úshin tek qoldanbanyń izdeý jolaǵyndaǵy mıkrofon belgishesin basý kerek. Dybystyq suraýlardy taný úshin «Iаndeks» qazaq tiline beıimdelgen «SpeechKit» tehnologııasyn qoldanady. Iаǵnı daýys mátinge aýdarylady, sodan keıin izdeýge jiberiledi. Nátıjesinde, qoldanýshy suraqty qolmen jazǵandaı jaýap alady. Qazaq tilindegi suraý salýlar boıynsha qoldanýshylar memlekettik tildegi derekterdi ǵana emes, sonymen qatar aǵylshyn, orys tilindegi aqparattardyń da aýdarylǵan nusqasyn kóredi.
«Biz qazaq tilindegi izdeý jumystaryn josparly túrde jasap, áli de damyta túsemiz. Bul múmkindik jeli qoldanýshylaryna yńǵaıly jáne qazaq tiliniń damýyna yqpal etedi», deıdi Qazaqstandaǵy qosymshanyń aǵa menedjeri Almaz Sádenov.
Statıstıkaǵa súıensek, elimizde naýryz aıynda 12 mln-nan astam adam «Iаndeks» qosymshasyn qoldanǵan. Budan bylaı onyń qazaqsha jazyp, qazaqsha túsinetini – jaqsy jańalyq. Biraq másele – onyń qalaı sóıleıtininde. Eger jeli qoldanýshylary memlekettik tilde kóbirek ári sapaly suraqtar qoısa, qosymshanyń da qazaqshasy damı túspek.