Shymkent qalasynyń ákimi Ǵabıt Syzdyqbekov 1 mamyr – Qazaqstan halqy birligi kúnine oraı tasqyn sýdan zardap shekken otandastarymyzǵa gýmanıtarlyq kómek aksııasyn uıymdastyrýda belsendilik tanytyp, járdemin aıamaǵan 12 azamatty arnaıy alǵyshatpen marapattady.
Marapatqa ıe bolǵandardyń qatarynda Shymkent qalalyq QHA tóraǵasynyń orynbasary, «Naırı» armıan etnomádenı birlestiginiń tóraǵasy Naıra Movsısıan, «Otaý-Stroı» JShS-nyń dırektory Aslan Álimbek, «Fırkan» JShS basshysy Ilıas Garıpov, ózbek etnomádenı birlestiginiń tóraǵasy Tahırbek Nıshanbaev, koreı etnomádenı birlestiginiń tóraǵasy Iýrıı Pan, «Barbang» kúrdileriniń qaýymdastyǵy» respýblıkalyq qoǵamdyq birlestiginiń Shymkent qalasy boıynsha fılıalynyń tóraǵasy Ismat Sýleımanov, «Kazakhstan Distributors Centre» JShS-nyń Shymkent qalalyq fılıalynyń menedjeri Damır Sagdeev, «Qagaz Ordasy» JShS-nyń dırektory Qanat Álimbaev, «Al Abaı» JShS basshysy Qasym О́serbaev, qalalyq assambleıa jastary uıymynyń tóraǵasy Nurbolat Meıirbekov, Ulttyq volonterlik front ofısiniń jetekshisi Qaıyrjan Bógenbaı men zańger Evgenıı Iаvorskıı bar.
Mereke qarsańyndaǵy marapattaý rásimi megapolıstegi «Dostyq úıinde» «Bereke – birlikte» taqyrybyndaǵy «dóńgelek ústel» aıasynda uıymdastyryldy.
Saltanatty is-sharaǵa qala ákimimen birge máslıhat tóraǵasy, etnomádenı birlestikterdiń jetekshileri men assambleıa janyndaǵy qoǵamdyq qurylymdardyń tóraǵalary, «Amanat» partııasy fılıalynyń atqarýshy hatshysy, kásipkerler palatasynyń dırektory, birqatar kásipkerler men volonterler, «Assambleıa jastary» uıymynyń jetekshileri qatysty.
Elge janashyr azamattardy alǵyshatpen marapattaǵan qala basshysy sý tasqynynan zardap shekken óńirlerge gýmanıtarlyq kómek jınap, olardy jóneltýge atsalysqan osynaý jandarǵa óz atynan shynaıy rızashylyǵyn bildirip, alǵysyn jaýdyrdy. «Syn saǵatta halqymyzdyń myzǵymas birligi aıqyn kórindi. Igi iske jumylǵan belsendiler alystaǵy aǵaıynǵa der kezinde demeý boldy», dedi shahar basshysy.
Osy oraıda joǵary basshylyq tarapynan «Júrekten – júrekke» aksııasy sý tasqynyna ushyraǵan otandastarymyzǵa gýmanıtarlyq kómek jiberýde naǵyz mańyzdy is-sharaǵa aınaldy. Assambleıanyń qaıyrymdylyq isteri jalǵyz bul emes. Talaı osyndaı qıyn apattyq jaǵdaılarda da etnomádenı birlestik músheleri jylý jınap, aǵaıyndyq tanytqan. Sol úshin de assambleıa múshelerine halyq dán rıza. О́zderiniń azamattyq ustanymymen árbir etnobirlestik quramyndaǵy kisiler Qazaqstannyń ortaq shańyraq ekenin, onyń turǵyndary bir-birine bóten emes, týys ekenin barshamyzǵa uǵyndyrdy degen oı-pikir aıtyldy.
Jıyn barysynda sý tasqynynan zardap shekken óńirlerge gýmanıtarlyq kómek kórsetý jónindegi qalalyq QHA janynan qurylǵan shtab jetekshisiniń orynbasary, qalalyq koreı etnomádenı birlestiginiń tóraǵasy Iýrıı Pan, Shymkent qalasy boıynsha Ulttyq volonterlik front ofısiniń jetekshisi Qaıyrjan Bógenbaı, qalalyq kásipkerler palatasynyń dırektory Sabıra Adambekova sóz sóılep, atqarylǵan jumystar jaıynda baıandama jasady.
Osy oraıda Iýrıı Pan bastaǵan koreı etnomádenı birlestiginiń úsh aptada 120 tonna gýmanıtarlyq kómek jınap, qarǵyn sýdan japa shekken elimizdiń soltústik, batys óńirlerine arnaıy kólik kerýenimen jóneltkenin erekshe aıtyp ótken jón. Shymkenttiń erikti azamattary da el basyna kún týǵan shaqta qarap jatpaı, qoldan kelgenshe gýmanıtarlyq kómek jınaýǵa kómektesip, tipti biraz adam sol apat aımaǵyna baryp, tasqynmen kúreste qol járdemin de kórsetip qaıtty. Al negizgi mindeti kásipkerlerdiń quqyǵyn qorǵaý bolyp tabylatyn jergilikti kásipkerler palatasy da ujym bolyp, qaltaly kisilerdi uıymdastyryp, shamalary jetkenshe járdemderin aıaǵan joq. Jıynǵa qatysýshylar eldiń birligi berik bolsa alynbaıtyn qamal joq ekenin taǵy bir márte eske túsirgendeı boldy. О́ıtkeni sý tasqyny kezinde úıinen, mal-múlkinen aıyrylǵan jandar ózderin dalada qalǵandaı jalǵyz sezingen joq. Memleket bir jaǵynan qoldaý sharalaryn uıymdastyrsa, qarapaıym kisiler ózindegi bar dúnıe-múlkimen bólisti. Al jylý jınaýda eń belsendi bolǵandardyń biri assambleıa músheleri ekenin bile júrgen abzal.
Sonymen 1 mamyr – Qazaqstan halqy birligi kúnine arnalǵan merekelik basqosýdyń qorytyndy sózinde qala ákimi Ǵ.Syzdyqbekov Memleket basshysynyń Qazaqstan halqy Assambleıasynyń HHHIII sessııasynda júktegen tapsyrmalaryn jergilikti jerde nátıjeli oryndaý úshin jospar ázirleýdi ári soǵan sáıkes keshendi jumystardy júıeleýdi tapsyrdy.
Jıyn sońynda Qazaqstan halqy Assambleıasynyń 2024 jylǵy 12 sáýirdegi №24-35-2.43 sheshimine sáıkes Qazaqstan halqy Assambleıasy quramyna jańadan qabyldanǵan múshelerge el Prezıdenti QHA Tóraǵasy Qasym-Jomart Toqaevtyń qoly qoıylǵan kýálikter tapsyryldy.