Almaty qalasynda óz elimizde shyǵarylǵan eń alǵashqy fandomat paıda boldy. Osylaısha, tehnıkalyq rejimde megapolıstegi Panfılov pen Tóle bı kósheleriniń qıylysynda plastıkalyq bótelkeler men sýsyndardyń alıýmınıı ydystaryn qabyldaıtyn alǵashqy fandomat iske qosyldy. Qundyq shıkizat qataryndaǵy turmystyq qaldyqtar muqııat suryptalǵannan keıin paıdaly taýarlar óndiretin kásiporyndarǵa odan ári qaraı óńdeýge jiberiledi.
Fandomatta barlyq ınnovasııalyq element bar. Máselen, olardyń biri – jasandy ıntellekt pen mashınalyq oqytý júıesi, ol alıýmınıı bankiler men plastıkalyq bótelkelerdiń shtrıh-kodtary nashar basylsa nemese qorapqa durys ornatylmasa da tanýǵa múmkindik beredi. Neırondyq jeli tehnologııasyn qoldana otyryp, fandomattaǵy kamera plastıkalyq bótelkeler men alıýmınıı bankilerdiń ártúrin avtomatty túrde tanyp, jikteıdi, mólsheri men salmaǵyn ólsheı alady.
«Bul opsııalar áli de tolyqtyryla túsedi, óndiris pen tehnologııasy jaqsarady. Qurylǵy táýlik boıy jumys isteıdi, sondyqtan alǵashqy fandomatty Panfılov kóshesine ornatý jóninde sheshim qabyldandy. Jaqyn arada fandomattar Arbatqa, Medeý HQKO-sy men Medeý muz aıdyny mańyna qoıylady. О́ıtkeni jazda osy aımaqta energetık sýsyndarynyń shashylǵan plastıkalyq bótelkeleri men bankalary jıi kezdesedi. Jobanyń 360 gradýs boıynsha áleýeti zor. Qaıta óńdelgennen keıin paıdaly materıalǵa aınalatyn qoqys azaıǵan saıyn qalany tazalaýǵa qarajat pen kúsh az jumsalyp, únemdelgen aqsha mańyzdy máselelerge baǵyttalady», dedi Almaty qalasy ákimdiginiń «Jasyl Almaty» GRBN jobalyq keńsesiniń basshysy Evgenıı Muhamedjanov.
Qazaqstanda jasalǵan fandomatty iske qosý rásimine qala ákiminiń orynbasary Álisher Ábdiqadyrov qatysyp, bul bastamanyń ekologııalyq tıimdiligi men resýrstardy únemdeý barysyndaǵy mańyzdylyǵyna toqtalyp, jobaǵa at salysqan Almaly aýdany ákimdiginiń ókilderin atap ótti. Qala ákiminiń orynbasary aryqtardan kún saıyn 60 tonnadaı qoqys shyǵarylsa, onyń 30%-y plastıkalyq bótelkeler men alıýmınıı bankalar ekenin aıtady.
Joba muryndyq bolǵan ári negizi ınvestor – «Freedom Holding Corp» kompanııasy bul isti qala ákimdiginiń Jobalyq keńsesi, Ekologııa jáne qorshaǵan orta basqarmasynyń qoldaýymen júzege asyryp jatyr.
О́z ornyn tapqan alǵashqy fandomatty avtomattandyrylǵan sálemdemeler qabyldaý pýnktterin qurýda aıtarlyqtaı tájirıbe jınaqtaǵan jergilikti «Tastamat» kompanııasy shyǵarady. Al joba operatory – Qazaqstannyń 9 qalasyndaǵy Jasyl keńse jobasy sheńberinde bólek jınalǵan turmystyq qaldyqtardy shyǵarý, qaıta óńdeýge jiberý, mamandar daıarlaý qyzmetin usynatyn «EMCO Network» kompanııasy.
Osynaý ınnovasııalyq qurylǵynyń biregeıligi sonda, qaıta óńdelgen materıaldan jergilikti satýshylardan satyp alynǵan metall men qańyltyr metaldy qabyldaý pýnktinen alynǵan temirden jınalyp, qurastyrylǵan.
Al qarapaıym halyq úshin fandomattyń artyqshylyǵy – Frıdom bank kartasyna fandomat kómegimen aqshasyn alyp ıakı qarajatty qaıyrymdylyq maqsattarǵa jibere alady.
О́z kezeginde mańyzdy bastamaǵa muryndyq bolyp otyrǵan «CEO Freedom Holding Corp» – ókili Tımýr Týrlov: «Jaqyn arada Almaty men Astananyń barlyq kórikti jerinde osyndaı 100 fandomat paıda bolady. Bul jobamen biz qoqysty bólek jınaýǵa arnalǵan qural jasap qana qoımaı, onyń aýqymyn keńeıtýge, ıaǵnı ekologııalyq mádenıet pen ádet qalyptastyrýdy, qaldyqtardy azaıtý, paryqty tutyný, aınalymdaǵy ekonomıkaǵa kóshýdi kózdep otyrmyz», deıdi.
ALMATY