Aıtysta «Darıdaı aqyn» atanǵan Qazaqstan Jazýshylar odaǵynyń múshesi, Mádenıet qaıratkeri, aqyn Muqash Seıitqazınovtiń úıinde otyrǵanda kózimizge ulttyq maqtanyshymyz, dańqty partızan Qasym Qaısenovtiń qoltańbasy qoıylǵan vızıtkasy ilikti. Munda «Aqyn inim Muqashqa birge saparlas kúnderden eskertkish. 6.H.99» dep jazylyp, qoly qoıylǵan eken.
– 1999 jyly qańtarda elimizde Prezıdent, al, sol jyldyń kúzinde Májilis saılaýy ótti. Bir mandatty okrýg boıynsha belgili aqyn Júrsin Erman da depýtattyqqa úmitker boldy. Júrsinniń shashbaýyn kóterip elge tanymal tulǵany bastap Jezqazǵan-Ulytaý jaǵyna Qasym aǵamyz da keldi. Sol topqa el jaqtan biz de qosyldyq. Qasekeńniń qasynda 20 kúnnen asa birge júrdik. Batyr aǵamyzdyń «saparlas kúnderden» dep jazýynda osyndaı mán bar, – deıdi Muqań.
Sol kúnderdi aqyn búginde asa bir jylylyqpen eske alady. Dańqty batyrmen birge júrgen kúnderin ómiriniń sáýleli shaqtaryna balaıdy.
«Qasym aǵamyzdyń qasynda bolyp áńgimesin kóp tyńdadyq. Buryn kitaptan oqyp, ertegilerden estıtin «batyrdyń uıqysy» degenniń qandaı bolatynyn sol joly kórdim. Jol júrip, bir aýyldan ekinshisine jetkende, Qasekeń qansha degenmen jasy kelgen kisi ǵoı, sharshańqyrap qalady. Shaı iship bolǵan soń, jastyǵyn alyp, qısaıa ketedi. Myna jaqtaǵy bizdiń abyr-dabyrǵa selt etpeı, uıqysyn qandyryp turady. Sonysyn kórip tańqalǵanym bar» deıdi ol. Sondaı-aq aqyndy batyrdyń ózinen buryn ózgeniń jaıyn oılap turatyn minezi tánti etken kórinedi. Olar el aralaǵanda birneshe kólikke bólinip minedi ǵoı. Qasym Qaısenov, Kamal Smaıylov, Júrsin Erman mingen kólik ańdaýsyzda bir shuńqyrǵa túsip ketip, ishindegiler qatty soqqy alyp qalady. Sálden keıin jaǵdaı durystalyp, jolǵa túskende Qasekeń qasyndaǵy eki inisine qarap: – Áı, Kamal, Júrsin! Jańa sen ekeýiń ólip qala jazdadyńdar ǵoı, deıtin kórinedi. Sol kóliktiń ishinde ózi de bolǵanyna qaramastan, qasyndaǵylaryn oılap otyrǵan aǵa júregi-aı!
Muqash aǵa Qasekeńniń ádildigin de erekshe súıispenshilikpen áńgimeleıdi.
– Barǵan jerimizde eldiń kóńilin kóterý úshin Abash Kákenov ekeýmiz aıtysamyz. Sóıtsem, Qasekeń bizdiń aıtysymyzǵa mán bere qaraıdy eken. Birde «Seniń sóziń Abashqa qaraǵanda salmaqtyraq, kúshtirek shyqty» dep qolymdy aldy. Rıza bolyp qaldym. Halqymyzdyń dańqty perzentinen mundaı lebiz estý degen barlyq ataq-dárejeden qymbat qoı, – deıdi ol.
Muqash Seıtqazınovtiń aıtýynsha, «Bizdi soǵys batyr etti. Al Baýkeń, Baýyrjan Momyshuly soǵys bolmasa da halyqqa batyr bolyp tanylatyn edi. О́ıtkeni ol tabıǵatynan solaı jaratylǵan», dep baǵalaǵan eken Qasekeń.
Aty ańyzǵa aınalǵan batyr aǵasynyń qoltańbasyn Muqań eń bir qundy jádigerlerdiń birine balaıdy.
Jezqazǵan qalasy