Obyrdyń emi – erte dıagnoz

Sonymen skrınıngtik zertteý­lerden qalaı ótýge bolatyny jóninde MSQ Almaty fılıalynyń mamandary túsinikteme berdi. Medısınalyq saqtandyrý qory­nyń málimdemesine súıensek, bıyl 228 myńǵa jýyq almatylyq turǵyn onko­logııalyq tekserýlerden ótýge tıis.

Skrınıng arqyly qandaı dertti anyqtaýǵa bolady?

Densaýlyqty bulaı tekserýmen jatyr moıny obyryn – 30-70 jas ara­lyǵyndaǵy áıelderden, sút bezi obyryn – 40-70 jas aralyǵyndaǵy áıelderden jáne kolorektaldy obyrdy 50-70 jas aralyǵyndaǵy erler men áıelderden erte anyqtaýǵa bolady.

Skrınıngten ótý jıiligi qandaı?

Skrınıngtik zertteýlerdiń keı túri bes jyl saıyn, keıbiri eki nemese tórt jyl saıyn jasalady. Mysaly, sút bezi isigi men toqishek obyryna eki jylda bir ret, al jatyr moıny obyryna tórt jylda bir ret tekserilý qajet.

Skrınıngtik baǵdarlamaǵa qandaı qyzmetter kiredi?

Áıelder jatyr moıny obyryna tirkelgen emhana arqyly tekseriledi. Akýsher-gınekolog, onkolog pen mammolog syndy mamandar keńesine júginip, ÝDZ, mammografııa syndy tekserýlerden óte alady. Sonymen qatar sút bezi obyrynyń aldyn alý úshin vıdeo­kolposkopııa nemese kolposkopııa, PAP-test, pýnksııalyq bıopsııa men gıstologııalyq zertteýlerge tapsyrýǵa bolady.

Kolorektaldy obyrdyń aldyn alý­ǵa ar­nalǵan tekserýlerden erler de, áıel­der de ótýge tıis. Profılaktıkalyq is-sha­ralar barysynda olar hırýrg, onko­log, gastroenterolog pen proktolog ma­man­dardan keńes alady. Sondaı-aq úlken dárettegi jasyryn qandy tekserý maq­satynda shuǵyl ádispen gemokýlt-test tapsyrady. Jalpy vıdeokolonosko­pııa, endoskopııalyq bıopsııa jáne gısto­logııalyq tekserýlerden ótýge bolady. Pro­fılaktıkalyq tekserýler MÁMS pake­tine engen, sondyqtan skrınıngten óte­tin azamat saqtandyrylǵan bolýy shart.

Skrınıng ótkennen keıin ne isteımiz?

Skrınıngtik zertteýden ótken pasıentterge densaýlyǵynan kinárat ta­bylǵan, qaterli isikterge kúdik anyq­talǵan jaǵdaıda salalyq mamandarǵa jol­­dama beriledi, qajet bolǵanda em taǵaıyn­dalady.

ALMATY