Bıylǵy jańbyrly kóktem kún saıyn myńdaǵan kóshet otyrǵyzylyp jatqan Almatyny burynǵydan da kórkeıtip, «Taza Qazaqstan» respýblıkalyq ekologııalyq aksııasy men «Almaty – bizdiń ortaq úıimiz» naýqanyna shyn máninde serpin berdi. Al Jeńis kúni Almatydaǵy Á.Jangeldın atyndaǵy gúlzarda Ardagerler alleıasy ashylyp, oǵan soǵys jáne eńbek ardagerleri ortaqtasty.
Jańa alleıada júz shaqty kóshet otyrǵyzyldy. Ońtústik shahardy jasyl jelekke kómkerip, jastardy eljandylyqqa bastaıtyn ulaǵatty is-shara barysynda Jetisý aýdandyq ardagerler keńesiniń tóraǵasy Tamara Shákirova: «Kez kelgen memlekettiń ál-aýqaty qarttar men balalarǵa degen kózqarasymen ólshenedi. Sondyqtan búgingi is-shara óte mańyzdy dep esepteımiz. Almatyda 43 soǵys ardageri qaldy, eńbek maıdanyna qatysýshylar da kóp emes. Jetisý aýdanynda turatyn bir ǵana ardager Ilıa Kýdınniń búgingi merekege kelgenine óte qýanyshtymyz», dep atap ótti.
Jańa alleıanyń ashylýyna arnaıy shaqyrylǵan aýdannyń qurmetti zeınetkerleriniń rızashylyǵyn Qulshara Sıenova jetkizdi: «Men Otanymyzǵa qyzmet etkenderge dán rızamyn. Búgingi qoǵamda olardyń erligi men eńbegin qurmettep, este saqtaǵanyn kórý men úshin maqtanysh. Bul alleıa árbir adam aıaldap, oılanyp, umytylmas kezeńder men qundylyqtardy eske alyp, keleshekke jetkizetin demalys mekenine aınalatynyna senemin», dedi.
Almaty qalasynyń ákimi Erbolat Dosaev soǵys ardagerleriniń shańyraqtaryna baryp, Memleket basshysy Qasym-Jomart Toqaevtyń quttyqtaýyn tapsyrdy.
Aldymen qala ákimi 1925 jyly 99 jastaǵy Ivan Begýnovtyń úıine bardy. Ýkraınanyń Jıtomır qalasynda dúnıege kelgen Ivan Matveevıch keıin Aqtóbe oblysynda keńes áskeri qatarynda qyzmet atqaryp, sol jerden maıdanǵa attanyp, 228-gvardııalyq atqyshtar polkiniń quramynda Eýropany azat etýge qatysqan.
«Ivan Matveevıch, sizdi kórgenime óte qýanyshtymyn. Kelesi jyly 100 jyldyq mereıtoıyńyzben quttyqtaımyz dep úmittenemin. Sizge bas ıip, taǵzym etip, Jeńiske qosqan úlesińiz úshin alǵys aıtamyz. О́zińizdeı batyrmen maqtanamyz», dedi E.Dosaev.
Qala basshysy soǵys ardageri Darbala Jabataevaǵa da erekshe iltıpat kórsetti. Qostanaı oblysynyń týmasy Darbala Ámirjanqyzy qysqamerzimdi kýrstan baılanysshy mamandyǵyn alǵan soń, 1943 jyly 18 jasynda óz erkimen maıdanǵa attanady. Boıjetkenniń aldynda fashısterdiń sany men ornyn anyqtap, ol derekterdi jedel túrde rasııa arqyly shtabqa habarlaý degen jaýyngerlik mindeti turdy. Qııan-keski shaıqastardyń birinde qazaq qyzy jaraqat alyp, gospıtalda emdelip shyqqan soń, II Belarýs maıdanynyń 4-tankke qarsy artıllerııalyq brıgadasyna attanǵan. Darbala Ámirjanqyzy jaýyngerlik jolyn Germanııada aıaqtaǵan.
Mártebeli orden-medaldarmen marapattalǵan soǵys ardageri osydan keıin de 30 jyl boıy jaýapty qyzmetterdi atqarǵan. Búginde Darbala Ámirjanqyzy bes nemere men alty shóbereniń súıikti ájesi.
Almaty ákiminiń ardagerlerdiń otbasyna baryp, dıdarlasýy aǵaıyn-týystyń ortasynda este qalarlyqtaı, erekshe yqylaspen ótti.
ALMATY