Qazaqstannyń memlekettik qyzmetshileri tájirıbe almasý jáne biliktiligin arttyrý maqsatynda Túrkııada taǵylymdamadan ótti, dep habarlaıdy Egemen.kz.
5 kúndik taǵylymdama Qazaqstan Prezıdenti janyndaǵy Memlekettik basqarý Akademııasy men Túrkııa Respýblıkasy Prezıdentiniń janyndaǵy Adam resýrstaryn basqarý jónindegi ofıs arasyndaǵy yntymaqtastyq týraly memorandým aıasynda júzege asyryldy. Taǵylymdamaǵa elimiz boıynsha 6 óńirdiń 13 memlekettik qyzmetshisi qatysty.
Taǵylymdamaǵa qatysyp kelgen Abaı oblysy Sáýlet, qala qurylysy jáne jer qatynastary basqarmasynyń basshysy Anzor Abaev kásibı daǵdylaryn arttyryp kelgenin aıtty.
«Taǵylymdama barysynda memlekettik apparattyń qyzmetimen jeke tanysýǵa, tikeleı oryndaýshylarmen jáne Túrkııanyń jekelegen memlekettik organdarynyń basshylyǵymen pikir almasýǵa múmkindik týdy. Taǵylymdama joǵary deńgeıde uıymdastyryldy jáne nátıjeli ótti. Sondaı-aq taǵylymdama aıasynda Túrkııa memlekettik apparatynyń basqarý júıesimen, jergilikti ákimdikterdiń, salalyq mınıstrlikterdiń qyzmetimen tereńirek tanystym. Qazaqstan Prezıdentiniń janyndaǵy Memlekettik basqarý akademııasyna bizge kásibı daǵdylarymyz ben quzyretterimizdi arttyrýǵa, bilimderimizdi keńeıtýge jáne tereńdetýge múmkindik bergeni úshin alǵysymdy bildiremin», dedi memlekettik qyzmetshi.
Taǵylymdama baǵdarlamasyna saı delegasııa HR Keńsesiniń qyzmetimen, sıfrlyq júıeni paıdalana otyryp, Túrkııanyń adamı resýrstardy basqarý salasyndaǵy tájirıbesimen tanysty. Mınıstrlikter men vedomstvolyq baǵynysty uıymdarda, Ankara jáne Kappadokııa qalalarynyń gýbernatorlarymen birqatar kezdesý ótti. Sonymen qatar memlekettik qyzmetshiler úshin Túrkııanyń Ishki ister mınıstrligine qarasty Apattar men tótenshe jaǵdaılardy basqarý keńsesinde (AFAD) sý tasqyny, jer silkinisi kezinde áreket etý, qutqarý operasııalaryn júzege asyrý boıynsha praktıkalyq dáris ótkizildi.
Qatysýshylar Túrkııa Respýblıkasy Mádenıet jáne týrızm mınıstrligi janyndaǵy Túrik yntymaqtastyq jáne úılestirý agenttiginiń qyzmetimen de tanysty. Taǵylymdama nátıjesi boıynsha memlekettik qyzmet salasyndaǵy ortaq is-sharalar men jobalardy iske asyrý týraly kelisildi.