Aýyl medısınasynyń ál-aýqatyn arttyrý úshin onda jas dárigerlerdi jóneltý jumystary óńirimizde júıeli jalǵasyp jatyr. Byltyr jas medısına mamandaryna berilgen áleýmettik qoldaý kólemi 5 mln teńge bolsa, bıyl 8,5 mln teńgege deıin ósedi. О́tken jyly bul múmkindikti paıdalanǵan 61 jas maman aýylda eńbek etip júr. Aýyldaǵy dáriger tapshylyǵynyń azaıyp kele jatqanynan áleýmettik qoldaýdyń tıimdiligin ońaı ańǵarýǵa bolady.
Buqar jyraý aýdany Botaqara kentinde jas dárigerler qajettiniń barlyǵymen qamtamasyz etilgen. Aýdanda «Dıplommen – aýylǵa!» baǵdarlamasy júıeli iske asyp tur. Buǵan sáıkes, turǵyn úı satyp alýǵa shamamen 9 mln teńge paıyzsyz nesıe qarastyrylǵan. Úı alǵysy kelmegen jas mamandarǵa qyzmettik turǵyn úıdi de tańdaý múmkindigi bar. Botaqaradaǵy aýdandyq aýrýhananyń tórt otbasyǵa arnalǵan medısınalyq úıi bar. Ortalyq jylytý júıesine qosylǵan úılerde qajetti jıhazben, turmystyq tehnıkamen qamtylǵan. Úıdiń janynda balalar oıyn alańy salynǵan. Bul jerden jas medısına mamandary turǵyn úıdi jalǵa alady.
Jalpy, praktıka dárigeri Ahror Ýsmanov Qaraǵandy oblysyna Ońtústik Qazaqstan óńirinen kóship kelgen. Qoja Ahmet Iаsaýı atyndaǵy Halyqaralyq qazaq-túrik ýnıversıtetin oıdaǵydaı aıaqtap, dıplomyn qolyna ustap, Botaqaraǵa qonys aýdarady.
– Bizdiń oqý ornymyzǵa Qaraǵandy oblysynan ókilder keldi, túlekterdi jumysqa shaqyrdy. Olardyń usynǵan sharttary unady. Oılanyp, barýǵa sheshim qabyldadyq. Búginde ýáde etilgen barlyq kelisim júzege asty. Áıelim de osy saladan, bolashaq medbıke, – deıdi A.Ýsmanov.
Akýsher-gınekolog Aqbota Qojamqulova da rezıdentýrany támamdaǵannan soń kúıeýimen, eki balasymen birge Botaqaraǵa kóship kelip, osynda jumysqa ornalasqan.
– Árıne, budan basqa da tańdaý boldy, birneshe aýrýhanadan jumys orny tabyldy. Barlyq jerde akýsher-gınekologterge suranys bar, jalpy, mamandyǵym suranysqa ıe. Munda jaqsy jaǵdaı usynyldy. Men qalada qalmaǵanyma ókinbeımin. Barlyǵy yńǵaıly, baspanaǵa qatysty ýaıym joq, barlyq jaǵdaı jasalǵan. Biz munda keregimizdi ǵana alyp, kele saldyq. Daıyn páterge qonystanyp, kelesi kúni jumysqa shyqtyq. Balalar birden mektepke ornalasty. Úı, jumys, mektep barlyǵy – jaqyn jerde. Ujymym da jaqsy, bári birden unady. Aýylda jumys istep, kásibı tájirıbe jınaýǵa bolady, – deıdi A.Qojamqulova.
Buqar jyraý aýdandyq aýrýhana dırektory Danııar Qojabaev beıindi mamandarǵa qajettilik áli de bar deıdi. Aýrýhanada materıaldyq-tehnıkalyq baza jańartylyp, zamanaýı jabdyqtar alynyp jatyr. Alaıda kadr jetispeýshiligi bar. Byltyr osyndaı baǵdarlamanyń qoldaýyn sezingen 8 jas qyzmetker kelgen: 3 akýsher-gınekolog, 2 jalpy tájirıbelik dáriger, 3 akýsher. Endi aýrýhanaǵa beıindi mamandar aýadaı qajet. Endokrınolog, ýltradybystyq zertteý mamany sekildi. Osy oraıda Danııar Qojabaıuly erterekte mundaı baǵdarlamalardyń bolmaǵanyn, qazirgi jas dárigerlerge qoldaýdyń túr-túri baryn atap ótti.
– Men osynda 90-jyldardyń sońynda keldim qaladan. Ol ýaqytta mundaı baǵdarlamalar bolǵan joq. Qazir jas mamandar úshin ázirlengen áleýmettik paket óte jaqsy. Bul – aýylda jumys isteýge keremet yntalandyrý, – deıdi aýrýhana dırektory.
Birrettik áleýmettik kómektiń «Dıplommen – aýylǵa!» baǵdarlamasynan bólek ekenin aıta ketýimiz kerek. Bul – sol kótermeaqynyń ústine engizilgen qosymsha qoldaý. Medısına salasynda jumys isteıtin mamandardy qoldaý, aýyldaǵy medısınany damytý, aýyldaǵy kadr tapshylyǵyn sheshý úshin ázirlengen baǵdarlama. Jyl basynda Parlament Májilisi baǵdarlamaǵa qatysty zań jobasyn qabyldaǵan edi.
Osyndaı baıypty baǵdarlamalarǵa súıene otyryp, jas mamandardy aýylǵa tartý arqyly ondaǵy dáriger tapshylyǵy joıylady. Rasymen, dıplomy bar kez kelgen bilikti mamanǵa birneshe tańdaý bar. Jan-jaqty áleýmettik qoldaý da mol. Jas dárigerge tek, jalyndap turyp, eńbek etý kerek.
Qaraǵandy oblysy