Raıhannyń túıgen tushparasy erekshe dámdi degen soń Kúrshimniń kóldeneń kóshesindegi sehqa qaraı burylǵanbyz. Shaǵyn sehta qarbalas tirshilik. Biri et týrasa, endi biri tushpara túıip otyr. Kásiptiń kózin tapqandarǵa memleket tarapynan árqashan qoldaý kórsetiledi emes pe. Dámi til úıiretin tushparaǵa suranys joǵary bolǵandyqtan, jergilikti ákimdikten Raıhan Nurǵazınaǵa tıimdi nesıe usynylǵan.
Qarjylaı kómektiń arqasynda suranysqa ıe kásiptiń aıasy odan ári keńeıe túsedi. Áýelde az-azdan satqan tushparasyna jyl óte suranys kóbeıgen. Jalǵyz ózi kúnine túıgen bes-alty kılo tushparasy lezde ótip ketip otyrǵan. Qazir kásibi keńeıip, eki adamdy jumyspen qamtyp otyr. О́ndiris kólemi de edáýir artqan. Sonyń ózinde sórede tushpara qalmaıdy. Farshqa nendeı dámdeýish qosatynyn kim bilsin, áıteýir aýyldyqtar «Raıhannyń tushparasy» dep, izdep júrip alady eken. Tipti О́skemennen de tapsyrys túsedi.
– Bastaǵan kásibime qoldaý kórsetken aýdan ákimdigine rahmet aıtamyn. 2009 jyly Kúrshimge kelin bolyp túskenmin. Ata-enem 20-25 jyl boıy tushpara túıip, nápaqa taýyp otyrǵan eken. Solarǵa kómektesip júrdim. Keıin bólek shyqtyq. Úıde balamen otyryp, tushpara jasaýdy qaıta qolǵa aldym. Bir jaǵynan jalǵyz ózi jumys istep júrgen joldasyma kómekteseıin dedim. Áýelde, eki dúkenge taratyp otyrdym. Jasaǵan tushparam halyqqa unady. Qolym da jattyqty. Keıin jumysqa shyǵyp kettim. Biraq keshkisin bala-shaǵanyń tamaǵyn berip tastaǵan soń tushpara túıip júrdim. Ol kezde 5-6 kıloǵa deıin tapsyrys túsetin, – deıdi Raıhan Nurǵazına.
Dámdi tushparaǵa suranys baryn baıqaǵan ákimdik ókilderi memleket tarapynan kómektiń baryn aıtqan. Sóıtip, úılerin kepildikke qoıyp, kásipti dóńgeletý úshin nesıege qoljetkizgen. Túsken qarjyny tushpara sehyn ashýǵa jumsaǵan. О́nim kólemin de ulǵaıtqan. Túrli tushpara, dámdi manty jasaı bastaǵan. Qazir 40 kılo tushpara túrin jasaıdy. Arasynda manty túıedi. Eń bastysy, klıent bazasy qalyptasyp úlgerdi. Tipti sonaý О́skemennen de suranys bar.
Raıhannyń aıtýynsha, ónimderin Kúrshim aýlynda 9 dúkenge, Saryóleńde 1 dúkenge taratady. Kúzge salym soıylǵan soǵymnyń súr eti taýsylǵandyqtan ba, kóktem shyǵa tushparaǵa degen suranys eki ese kóbeıedi. Kásipker kelinshek munymen toqtap qalmaı, kásibin budan da bıikke kóterýdi armandaıdy.
Shyǵys Qazaqstan oblysy,
Kúrshim aýdany