Qazir keı óńirlerde tasqynmen kúres jumystary jalǵasyp jatyr. Aımaqtarda qutqarýshylar, jergilikti turǵyndar judyryqtaı jumylyp, ortaq iske atsalysyp júr. Olardyń qatarynda «Jastar rýhy» jastar qanatynyń 3 myńnan asa volonteri de bar.
«Jastar rýhy» jastar qanatynyń tóraǵasy Aqerke Iskanderovanyń aıtýynsha, sý tasqyny bastalǵaly beri qutqarýshylarmen qatar kómek kórsetip, aldyńǵy qatarda júrgen jastar sany arta túsken.
«Jergilikti organdar men volonterler ózara tyǵyz jumys júrgizip jatyr. Apattan zardap shekken turǵyndarǵa qajet zattardy jetkizý kerek. «Jastar rýhy» janynan elimizdiń barlyq óńirinde jedel áreket etetin Respýblıkalyq volonterler shtaby quryldy. Sýdan zardap shekken turǵyndar nemese volonterler qataryna qosylam deýshi jastar osy shtabqa habarlasa alady. Elimizdegi barlyq respýblıkalyq volonterlik birlestikter jumyla jumys istep keledi. Olardyń jumysyn «Jastar rýhy» jastar qanaty úılestirip otyr. Máselen, jýyrda Atyraý oblysyna jetken 30 tonna gýmanıtarlyq kómekti «Jastar rýhy» men Qazaqstan stýdentteri Alıansy volonterleri qabyldap alyp, pýnktterge jetkizdi. Sondaı-aq «Dauletten» qaıyrymdylyq qorymen birge Soltústik Qazaqstan oblysyna kerekti zattardy jónelttik», dedi A.Iskanderova.
Sý tasqyny bastalǵaly beri volonterlerdiń birlesken kúsh-jigeri tabıǵı apat saldaryn azaıtýǵa, zardap shekken azamattarǵa jan-jaqty kómek kórsetýge baǵyttalǵan. Atap aıtsaq, halyqty qaýipsiz oryndarǵa kóshirý, sý bógeý, ózen deńgeıiniń kóterilýine jol bermeý úshin qapshyqtardy qummen toltyrý, gýmanıtarlyq kómek jınap, ony úlestirý, qutqarýshylardy ystyq tamaqpen, shaımen qamtamasyz etý, sý astynda qalý qaýpi bar úılerdiń mańyn qardan tazartý jumystary atqarylyp jatyr.
Sondaı-aq «Biz Birgemiz» qoǵamdyq qorynyń qoldaýymen azyq-túlikpen qatar elektr jaryǵynsyz otyrǵan aýyldarǵa generatorlar da jetkizildi. Osy tusta aıta ketetin jaıt, gýmanıtarlyq kómekti tez ári dereý jetkizý úshin Tótenshe jaǵdaılar mınıstrligi tikushaqpen qamtamasyz etti. Áýe joly arqyly kómek Atyraý, Aqtóbe, Mańǵystaý oblystaryna jetti.
О́kinishke qaraı, sý tasqyny bastalǵan sátte Abaı oblysynda adamdar joǵaldy. Olardy izdestirý jumysyna da eriktiler atsalysty. Sondaı-aq «Jastar rýhynyń» 100 volonteri Qostanaı qalasy ákiminiń shaqyrýyn qabyldap, jaǵalaýdy qum salynǵan qaptarmen nyǵaıtýǵa kómektesti. Volonterler óńirdegi sý basý qaýpi bar aýmaqtarda turǵyndarmen ıyq tirese jumys istep, jaǵaǵa bóget qoıý isine belsene atsalysty. Osyǵan uqsas jumys ózge óńirlerde de uıymdastyryldy.
«О́zen tasıdy degennen beri qala mańyndaǵy shaǵyn aýdandarda qaptarǵa qum toltyryp, bóget salyp jatyrmyz. Volonterler qatarynda jasóspirimder, egde jastaǵy turǵyndar, túrli sala qyzmetkerleri bar. Ýaqytpen sanaspaı apattyń aldyn alýǵa barynsha kúsh salýdamyz», deıdi atyraýlyq volonter Jalǵas Halelov.