Qazaqstanda «Baıqońyr» ǵarysh aılaǵy aýmaǵynda 300-ge jýyq jańa jumys orny ashylady. Bul týraly Úkimet basshysy Oljas Bektenovtyń depýtattyq saýalǵa bergen jaýabynda aıtylǵan, dep habarlaıdy Egemen.kz.
«2022 jylǵy 2 jeltoqsandaǵy «Baıqońyr» kesheni boıynsha úkimetaralyq komıssııanyń 8-shi otyrysynyń hattamasyn oryndaý aıasynda reseılik tarap jalǵa alýshylar tiziminen shyǵarýǵa usynylǵan 234 nysannyń tizimin usyndy. Olardyń negizinde 300-ge jýyq jańa jumys ornyn ashý arqyly óndiristi uıymdastyrý josparlanýda», dedi O.Bektenov.
Premer-mınıstr Úkimettiń 2023 jylǵy 28 naýryzdaǵy qaýlysymen ǵarysh salasyn damytýdyń 2023 – 2029 jyldarǵa arnalǵan tujyrymdamasy bekitilgenin, onda belgilengen tehnologııalyq bazanyń tıimdiligin arttyrý, ózin-ózi basqarý júıesin qalyptastyrý sııaqty negizgi tásilder qarastyrylǵanyn atap ótti.
Salany damytýdyń strategııalyq mindetterin Aeroǵarysh komıteti júzege asyrady, oǵan retteý, iske asyrý jáne baqylaý boıynsha qajetti fýnksııalar berilgen. Ǵarysh salasyn damytý boıynsha jumystyń negizgi baǵyty – memlekettik tapsyrystar esebinen respýblıkalyq bıýdjetten qarjylandyrylatyn eleýli jáne kapıtaldy qajet etetin jobalardy júzege asyrý.
«Ǵarysh salasyn qarjylandyrýdyń jańa tásili retinde ınvestısııalyq qor ashý múmkindigi talqylanyp jatyr. Alaıda bul másele egjeı-tegjeıli zertteýdi qajet etedi», dep qosty Oljas Bektenov.
Qyrmyzy JUMAǴALIQYZY,
EUÝ stýdenti