Qaraǵandy dárigerleri aýyr dertke shaldyqqan eki aılyq balaǵa kúrdeli operasııa jasap, sábıge ómir syılady. №2 kópsalaly aýrýhananyń dárigerlerine, kardıologııalyq ortalyqtyń hırýrgterine balanyń ata-anasy alǵys jaýdyrdy.
Sábıdiń anasy balasynyń aýrýhanaǵa alǵash qańtar aıynda túskenin, emhanada júrekke jasalǵan ýltradybystyq zertteýi negizinde «Tetrada Fallo» dıagnozy qoıylǵanyn aıtady. Sol ýaqytta dereý aýrýhanaǵa jatqyzylyp, bir aıdan keıin operasııanyń birinshi kezeńin jasaǵan.
Kardıologııalyq ortalyqtyń hırýrgteri júıeli-ókpe anastomozy operasııasynyń birinshi kezeńin jasady. Arterııa tarylǵan jerde ókpe arterııasyna stent ornatyldy. Bul bolashaqta aqaýdy túzetýge jáne radıkaldy operasııa jasaýǵa múmkindik beredi eken.
– Sábı aýrýhanaǵa aýyr halde tústi. Biz operasııanyń birinshi kezeńin júrgizdik. Bul soǵyp turǵan júrekke jasalady. Operasııa balanyń qalypty damýyna, júrektiń tolyǵymen túzetýge daıyndalýyna kómektesedi. 4-5 aıdan soń operasııanyń ekinshi kezeńin jasaý kerek. Bul Fallo aqaýyn túbegeıli túzetýge múmkindik beredi, – deıdi №2 kópsalaly aýrýhananyń balalar kardıohırýrgııasy bólimshesiniń meńgerýshisi Janat Bolatbekuly.
Mamandar «Tetrada Fallony» tórt anatomııalyq anomalııany biriktiretin týabitken júrek aqaýy dep túsindiredi. Qarynshalyq perde aqaýy, ortanyń yǵysýy, oń jaq qarynshanyń stenozy jáne gıpertrofııasy. Júrek aqaýy qannyń ottegimen qanyǵý deńgeıiniń birtindep tómendeýine ákeledi. Búkil aǵzanyń jumysynda ózgeris paıda bolady, ımmýnıtet tómendeıdi, mı qyzmeti jáne aǵzanyń jalpy damýy baıaýlaıdy. Naýqastyń júrek ustamasy kezinde denesi kógeredi, jyldam tynystaı bastaıdy, mazasyzdanady.
Ýaqytynda jasalǵan operasııanyń oń nátıjesinde mamandar kishkentaı naýqasqa týabitken júrek aqaýyn kezeń-kezeńimen túzetip, tolyqqandy ómir súrýge múmkindik jasaýǵa tyrysty. Bul operasııa qymbat ári kúrdeli eken. Dári-dármek pen medısınalyq em-sharalar kóp ýaqytty qajet etedi. Ony tegin medısınalyq kómektiń kepildik berilgen kólemi jáne MÁMS júıesi aıasynda alady.
Qaraǵandy oblysy