Senator Altynbek Nuhuly óziniń depýtattyq saýalynda Esik qorǵanynan «Altyn adamdy» tapqan arheolog Kemel Aqyshevti eske alýdy usyndy, dep habarlaıdy Egemen.kz Senattyń baspasóz qyzmetine silteme jasap.
Parlamentshiniń aıtýynsha, bıyl Qazaqstan arheologııasynyń negizin qalaýshy, memlekettik syılyqtyń laýreaty, eńbek sińirgen ǵylym qaıratkeri Kemel Aqyshevtiń 100 jyldyq mereıtoıy atap ótiledi. Ol Qazaqstan táýelsizdiginiń sımvolyna aınalǵan «Altyn adamdy» tapqan. Kemel Aqyshev uzaq jyldar boıy Ortalyq Qazaqstandaǵy arheologııalyq nysandarǵa zertteý júrgizdi. 1940 jyldary ol Beǵazy jáne Sangrý sekildi qola dáýirindegi qorymdardy zertteýge qatysty.
«Kemel Aqyshev – Jetisý, Soltústik jáne Ońtústik Qazaqstan arheologııalyq ekspedısııalarynyń bas jetekshisi bolyp, kóne jáne orta ǵasyrlardaǵy eskertkishterdi, Besshatyr, Otyrar jádigerlerin ashyp, zerttedi. 600-den astam arheologııalyq eskertkishti taýyp, «Qazaqstannyń arheologııalyq kartasyn» jasap shyqty. Atalaǵan karta qazirgi kezde de óte ózekti, suranysqa ıe, biregeı anyqtamalyq bolyp sanalady. Ol Esil ózeniniń boıynan jumbaq qalany taýyp, ejelgi qalaǵa Bozoq degen ataý berdi», dedi Altynbek Nuhuly.
Senator Bozoqtaǵy Ulttyq saıabaqqa, sondaı-aq Almaty, Astana qalalary jáne Pavlodar, Almaty oblystary kósheleri men mektepterine Kemel Aqyshevtiń esimin berýdi, sondaı-aq atalǵan jerlerde murajaı ashýdy usyndy.