Májilis spıkeri Erlan Qoshanovtyń tóraǵalyǵymen bıýro ótip, aldaǵy jalpy otyrystyń kún tártibi naqtylandy. Aldaǵy jalpy otyrysta Májilis Qazaqstan men Qytaı Halyq Respýblıkasynyń Úkimetteri arasyndaǵy birqatar kelisimdi ratıfıkasııalaıdy.
Halyqaralyq avtomobıl tasymaldary týraly kelisim kólik-tranzıttik jáne saýda-ekonomıkalyq qatynastardy odan ári damytýǵa baǵyttalǵan.
Al Transkaspıı halyqaralyq kólik baǵytyn damytý jónindegi kelisim Transkaspıı halyqaralyq kólik baǵyty boıynsha mýltımodaldy tasymaldardy damytýdy kózdeıdi. Bul Qazaqstan men Qytaı aýmaqtary boıynsha júkterdi tasymaldaý úshin qolaıly jaǵdaı jasaýǵa múmkindik beredi.
Transkaspıı halyqaralyq kólik baǵytyn, onyń ishinde «Qytaı – Eýropa» baǵytyndaǵy konteınerlik poıyzdar úshin damytý jónindegi kelisim eki eldiń aýmaǵy boıynsha konteınerlik poıyzdar úshin eksporttyq-ımporttyq, tranzıttik tasymaldardy ulǵaıtý jónindegi yntymaqtastyqty odan ári damytýdy kózdeıdi.
Jalpy, otyrystyń kún tártibi jobasyna Túrki memleketteri uıymyna múshe elderdiń úkimetteri arasyndaǵy halyqaralyq quramdastyrylǵan júk tasymaldary týraly kelisim de bar. Qujat túrki memleketti arasynda temirjol, sý jáne avtokólik arqyly júk tasymaldaý kólemin arttyrýǵa jol ashady.
Sonymen qatar depýtattar Dúnıejúzilik saýda uıymyn qurý týraly Marrakesh kelisimine (Balyq aýlaý sýbsıdııalary jónindegi kelisim) ózgerister engizý týraly hattamany ratıfıkasııalaý týraly zań jobasyn talqylaıdy. Onyń maqsaty – dúnıejúzilik muhıtqa shyǵatyn teńizderdiń balyq resýrstaryn zańsyz, habarlanbaıtyn jáne rettelmeıtin kásiptik aýlaýǵa yqpal etetin sýbsıdııalardy shekteý jolymen saqtaýdy qamtamasyz etý.
Depýtattar ekinshi oqylymda memlekettik statıstıka jáne derekterdi basqarý máseleleri boıynsha ózgerister men tolyqtyrýlar engizý týraly zań jobasyn qaraıdy. Sondaı-aq Májilis komıteti «Memlekettik (mýnısıpaldyq) satyp alýdy júzege asyrý kezinde bank kepildikterin ózara taný týraly kelisimdi ratıfıkasııalaý týraly» zań jobasyn jumysqa alatyn bolady.