Qazaqstan halqynyń tapqan tabysy kóbinese meıramhana men dámhanada tamaqtanýǵa ketedi. Bir otbasy syrttan as ishýine jylyna kemi 75 myń teńge jumsaıdy, dep jazady Egemen.kz.
Statıstıka boıynsha, ásirese Mańǵystaý oblysynyń turǵyndary úıden tys jerde as ishýge jany qumar eken. Olar joq degende, 200 myńnan astam teńgesin dámhanaǵa jumsaıdy. Al almatylyqtar bul tizimde tórtinshi orynǵa jaıǵasypty.
Finprom.kz agenttiginiń málimetinshe, elimizde bir otbasy jylyna kemi 75 myń teńgesin meıramhana men dámhanaǵa jumsaıdy eken.Tizimde Mańǵystaý oblysy kósh bastap tur. Olar 200 myń teńgeden astam qarajatyn syrttan tamaqtanýǵa jaratady. Ekinshi orynda astanalyqtar tur. Al almatylyqtar 100 myńǵa jýyq qarajatyn qoǵamdyq tamaqtanatyn oryndar men dámhanalarda jumsaıdy. Restoratorlar as mázirindegi baǵanyń kúnnen-kúnge ósip jatqanyn aıtady. Azyq-túlik ónimderine ketetin shyǵynnan bólek, mekemeni jalǵa alý, ydys-aıaq, qyzmetkerlerge beretin qarjy baǵanyń ósýine ákeledi deıdi.
«Bir jyldyń ishinde meıramhanalar shamamen 30 paıyzǵa qymbattaǵany ras. Sebebi ,ózderińiz bilesizder, jumysshylardy da az jalaqymen ustap otyra almaımyz. Mysaly, men shyǵyndy azaıtý úshin kadrdy qysqartyp, olardyń jumysyn óz moınyma alyp otyrmyn», - dedi QR Restoratorlar qaýymdastyǵynyń múshesi Tımýr Ǵaıpanov.
Dese de qymbatshylyqqa qarap jatqan halyq joq sııaqty. Meıramhana qyzmetkerleri kelýshilerdiń kún sanap ósip jatqanyn aıtady. Jaz mezgilinde jurt kóbine terassada otyryp, tańǵy, túski, keshki asyn ishedi.
«Adam sany ár aı saıyn ósedi. Jumys kúnderi adamdar óte kóp. Ásirese dúısenbi, sársenbi kúnderi. Sebebi sol kúnderi jumystan sharshaǵan adamdar túski ýaqytta tamaqtanady. Al keshke qaraı kóbine juptarymen, otbasymen keshki asyn ishedi», - dedi meıramhananyń marketıng qyzmetkeri Juldyz Áıip.
Al ekonomıster muny jahandyq damý dep túsindiredi. Adamdar aýyldan qalaǵa belsendi túrde kóship, bar ýaqytyn qarajat tabýǵa jumsaıdy dedi.
«Pandemııadan keıin azyq-túlik baǵasynan bólek, dándi daqyldarǵa deıin qymbattaǵany ras. Bul aýyl sharýashylyǵynyń damymaı jatqanyn kórsetedi. О́zimizdiń óndiriske mán bermeımiz. Syrttan ımporttap alýǵa janymyz qumar. Ad adamdardyń meıramhanalarǵa degen suranysyn ýrbanızasııa dep aıtar edim», - dedi ekonomıst Arman Baıǵanov.
Degenmen elimizdiń qoǵamdyq tamaqtaný oryndaryndaǵy baǵany álemdik standarttarǵa saı keledi dep aıtý qıyn. Baǵanyń qymbat ekenin reıtıngtan-aq ańǵarýǵa bolady. Eń arzan meıramhanada tamaqtandym degenniń ózinde, joq degende, 9 AQSh dollary, ıaǵnı 4000 myń teńgeni tastap ketemiz. Mundaı baǵamen barlyǵy 97 el qatysqan reıtıngte Qazaqstan 42-shi orynǵa jaıǵasypty.