Dúnıejúzilik densaýlyq saqtaý uıymyna múshe memleketter uıymnyń Konstıtýsııasynda qarastyrylǵan pandemııanyń aldyn alý, daıyndyq jáne áreket etý máselelerin jahandyq bekitý tártibine kelisti, dep jazady Egemen.kz.
COVID-19 pandemııasynyń áserin joıý maqsatynda DDU-nyń 194 múshe-memleketi konvensııa ázirleýge kelisti. Konvensııa bolashaq yqtımal pandemııalardyń aldyn alý men saqtanýdy kózdeıdi. Jahanda mundaı daǵdarystar qaıtalansa orasan zor adam shyǵyny bolyp, ekonomıkalyq, demografııalyq damý deńgeıine jaǵymsyz áser etetini anyq. Jıynda usynylǵan sharttar barlyq adamnyń pandemııadan qorǵanýyna birdeı jaǵdaı jasap, onyń ishinde, vaksınalar, jeke qorǵanys quraldary, aqparat jáne saraptama, densaýlyq saqtaý qyzmetterine teń qoljetimdilikti qamtamasyz etedi.
Bul kelisim jetpis jetinshi Dúnıejúzilik densaýlyq saqtaý assambleıasynyń aıasynda qabyldandy. Is-shara 2024 jyldyń 27 mamyry men 1 maýsymy aralyǵynda Shveısarııanyń Jeneva qalasynda «Bári densaýlyq úshin, densaýlyq barlyǵy úshin» taqyryby aıasynda ótip jatyr.
«Bizdiń múshe-memleketter pandemııa týraly kelisimniń bolashaq urpaqtardy COVID-19 pandemııasy kezinde bastan ótkergen qasiretterden qorǵaý úshin qanshalyqty mańyzdy ekenin tolyq túsinedi. Men olarǵa ortaq negizdi tabýǵa jáne Dúnıejúzilik densaýlyq saqtaý assambleıasynyń osy tarıhı kelisimin aıaqtaýǵa naqty mindetteme bergeni úshin alǵys aıtamyn», dedi Dúnıejúzilik densaýlyq saqtaý uıymynyń bas dırektory Tedros Adhanom Gebreıesýs.
Bul kelisimshart ulttyq jáne jahandyq deńgeıde adamdardyń densaýlyǵy men ál-aýqatyna áser etetin kóptegen salalarda odan ári yntymaqtastyqty qamtamasyz etý jáne nyǵaıtý úshin jasalyp otyr.
Erlan KIIKBAI,
L.N.Gýmılev atyndaǵy EUÝ stýdenti