Memleket basshysy Qasym-Jomart Toqaev jol ınfraqurylymyn damyta túsýdiń mańyzyna únemi mán beredi. «Úkimet pen oblys ákimdikteri 2025 jylǵa deıin jergilikti jerlerdegi joldardyń 95 paıyzyn jóndep, retke keltirýge tıis» degen tapsyrma júktegen edi. Osyǵan sáıkes Qaraǵandy oblysynda tozǵan joldardy asfalttaý jumystary asa qarqyndy júrgizilip jatyr.
Bıyl Qaraǵandy oblysynda jergilikti jeli quramyna kiretin 571 shaqyrym avtomobıl joly jóndeledi. Bul týraly oblys ákimdiginde ótken keńeste jolaýshylar kóligi jáne avtomobıl joldary basqarmasynyń basshysy Maqsut Qojanov aıtty.
– Oblystyq mańyzy bar 178 shaqyrym joldy, qalalar men aýdandarda 281 shaqyrym jáne «Aýyl – el besigi» arnaıy jobasy boıynsha 112 shaqyrym jol bóligin jóndeý josparda bar. «Sáken Seıfýllın – О́spen – Aqadyr» avtojolynyń 26 shaqyrymynda, sondaı-aq «Aqsý – Aıýly – Aqtoǵaı» avtojolynyń 57 shaqyrymynda ortasha jóndeý jumystary júrgiziledi. «Qarqaraly – Qoıandy» ýchaskesine ortasha jóndeý jumystary jalǵasyp jatyr, – dedi Maqsut Qojanov.
Qala ishindegi jol qurylysy jumystarynda kidiris joq. Bıyl 128 shaqyrym jol jóndeledi. Nátıjesinde, jol tóseminiń normatıvtik jaǵdaıdaǵy úlesi 72-den 79%-ǵa deıin ulǵaıady.
Pıchýgın – Novoselov kóshelerinde byltyr bastalǵan kúrdeli jóndeý jumystary jalǵasyn taýyp jatyr. Barlyǵy 4,8 shaqyrym jol tósemin jańartý qajet. Temirjol vokzalynan Tereshkova kóshesine deıin, 7-magıstralǵa shyǵar jolǵa deıin asfalttalady.
Byltyr osy joldaǵy sý jáne káriz jelileri qaıta qurylǵan edi. Mundaı sharýa aldaǵy ýaqytta qandaı da bir sý, káriz jelisinen apat bolǵan jaǵdaıda, jańa asfaltty qaıta qoparmaý úshin jasalyp otyr. Munymen qosa, Tereshkov kóshesindegi aınalma joldan Prıgorodnaıaǵa deıin asfaltbetonnyń tómengi qabaty tóseldi. Endi ondaǵy jol qabaty tolyǵymen aýystyrylady.
– Qaraǵandyda jol jóndeý maýsymy bastaldy. Qym-qýyt qala tirshiliginde jaıaý júrginshiler jolynyń qurylysy jóninde aıtylǵan syn-eskertpelerdi negizge alamyz. Jol qozǵalysyn tehnıkalyq retteýdi jaılastyrý rasynda saýatty kózqarasty talap etetindeı. Nóserli káriz jelilerin salý mejelendi. Kezeń-kezeńimen qarjylandyrý júıesin nysana ettik. Bul – utymdy tásil. Tutastaı alǵanda, qala boıynsha 128 shaqyrym jóndelmek. Ol úshin 24 mlrd teńge qarastyryldy. Jumys úderisine 5 satyly baqylaý amaly iske asyrylady. Jol aktıvteri sapasynyń ulttyq ortalyǵynyń zerthanasy baqylaıdy. Sony tehnologııany sátti engizip jatyrmyz dep oı aıtýǵa bolady. Onyń tıimdiligin ýaqyt kórsetedi. Bıyl ortalyq kóshelerdi bir eńserip alsaq, odan keıin halyq nazary túsken jerlerge mán beremiz. Bıyl jóndeý jumystarynyń jospary – 128 shaqyrym – 2 qurylys nysany, 2 kúrdeli jóndeý, 1 rekonstrýksııa, 127 orta jóndeý ýchaskesi, – deıdi qala ákiminiń orynbasary Rústem Qojaqapanov.
Búginde temirjol vokzalynan Gogol kóshesine deıin jaryq baǵandaryn alyp tastap, jol tósemin frezerleý júrgizilgen. Iаǵnı Pıchýgın kóshesiniń 4,8 shaqyrymdyq avtojolyn kúrdeli jóndeý kezinde, asfalt tóseminiń joǵarǵy qabaty alynyp tastalǵan. «Jańa asfalt tóseý úshin jer bederiniń tegistigine asa mán berildi» deıdi mamandar. S4 markaly qıyrshyq tas materıaly tóselip jatyr. Bul qıyrshyq tas markasy drenajdyq qasıetke ıe. Aýyr salmaq pen qytymyr aıazǵa, túrli temperatýra men ylǵalǵa tózimdi.
– Osy baǵyttaǵy jumysqa 10 sáýirden bastap kiristik. Bul kóshe kópten beri jóndeý kórmegen. Biraq saraptaý amaldarynyń nátıjesinde jol sapaly salynǵan. Biz endi munda úsh qabatty tósem jasaımyz. Barlyq qabaty ózdiginen joldyń joǵary sapasy men beriktigin qamtamasyz etedi. Qajet materıaldy durys tańdaý jáne tóseý tehnologııasyn saqtaý jol tóseminiń ońtaıly ónimdiligi men beriktigine kepildik bolady. Bıyl jobany utyp alǵandaǵy joba quny 1,7 mlrd teńge bolǵan. Keıinirek qazirgi baǵam men sanasııa qyzmetin eskere otyryp, baǵa 3,6 mlrd teńgege jýyqtady, – deıdi «Agrodor» JShS dırektory Natalıa Malchýshkına.
Shahardyń ońtústik-shyǵysynda «Zaman», «Atamura» turǵyn úı keshenderi boı kótergen aýdandaǵy №1 ýchaskede joldyń túbin jaılastyrý, nyǵyzdaý, topyraq ázirleý jumystary júrip jatyr. Buryn munda asfalt múldem bolmaǵan eken. Búginde nysandaǵy káriz qudyqtaryn tazartý, jol qurylysynyń qujaty negizinde asfaltbeton tóseýden basqa da, kólik qozǵalysyn retteýdiń tehnıkalyq quraldaryn ornatý josparda bar kórinedi. Mysaly, avtobýs aıaldamalary men zamanaýı syrtqy jaryqtandyrýdyń mán-mańyzy joǵary.
– Qosqabatty asfaltbeton tóseýdi oılastyryp otyrmyz. Jaıaý júrginshiler jolyn salý da oıymyzda bar. Káriz júıesin salý ómirsheń mánge ıe. Joba quny 3,2 mlrd teńge shamasynda. Búginde 300 mln teńge somasyndaǵy qarajat ıgerilýde. Tosyn jaılar kezikpese, bul baǵytty qyrkúıek aıynda qoldanysqa berý kózdelip otyr. Jol – buqara nazaryndaǵy dúnıe. Sondyqtan tehnıkalyq qadaǵalaý jumysyna basa mán berilýi qajet. Talap joǵary, – deıdi qalalyq avtomobıl joldary sektorynyń meńgerýshisi Mádi Qojanov.
«Bıtýmnyń jartysy kórshiles Reseıden, qalǵany Pavlodardan jetkiziledi. «Bıtým nashar» demeńiz. О́ıtkeni tıtandy bıtýmǵa qospa retinde qoldanamyz. Bul – jol qurylysyndaǵy óristi baǵyt. Tıtan qospalary jol tóseminiń ónimdiligin edáýir jaqsarta alady, olardyń beriktigin, temperatýraǵa tózimdiligin arttyrady, tozýyn jáne «qartaıýyn» tejeıdi», dep sendirdi merdiger kompanııa ókili.
Qaraǵandy oblysy